پرەزيدەنت: ۇستاز - ءار ادامنىڭ ومىرىنەن ەرەكشە ورىن الاتىن تۇلعا
استانا. KAZINFORM - مەملەكەت باسشىسى مۇعالىمدەردى كاسىبي مەرەكەسىمەن قۇتتىقتادى. بۇل تۋرالى اقوردانىڭ باسپا ءسوز قىزمەتى حابارلادى.
اقوردادا ۇستازداردىڭ كاسىبي مەرەكەسىنە وراي سالتاناتتى ءىس-شارا ءوتتى. قاسىم-جومارت توقايەۆ پەداگوگتەردى مەرەكەسىمەن قۇتتىقتاپ، مۇعالىم كۇنى بۇكىل قوعامدى بىرىكتىرەتىن، ناعىز حالىقتىق سيپاتى بار، قاستەرلى دە قادىرلى مەرەكەگە اينالعانىن اتاپ ءوتتى.
- ۇستاز - ءار ادامنىڭ ومىرىنەن ەرەكشە ورىن الاتىن تۇلعا. بۇعان ەشكىمنىڭ دە تالاسى جوق دەپ ويلايمىن، بۇل - بارىمىزگە ورتاق پىكىر. ۇستازدى ۇلىقتاۋ وركەنيەتتى قوعامنىڭ بولمىسىن ايقىندايتىن اسا ماڭىزدى قاسيەت سانالادى. ۇلت ويشىلى اباي ادامنىڭ ادامدىعى جاقسى ۇستازدان بولاتىنىن ايتقان. حالقىمىزدىڭ زاڭعار جازۋشىسى مۇحتار اۋەزوۆ تە « ۇستاز - ۇلى ەسىم» دەپ قادىر تۇتقان. مۇعالىمدەر قاۋىمىنا زور قۇرمەتپەن قاراۋ، ولاردىڭ ۇلت بولاشاعى ءۇشىن اتقارىپ جاتقان تاباندى ەڭبەگىنە العىس ايتۋ - بارشامىزعا ورتاق پارىز. اسىرەسە، قازىرگىدەي اقپاراتتار اعىنى كۇشەيىپ، وزىق تەحنولوگيا قارقىندى دامىعان زاماندا مۇعالىمنىڭ ءرولى الدەقايدا ارتا تۇسكەنى اقيقات، - دەدى پرەزيدەنت.
قاسىم-جومارت توقايەۆ مەملەكەت باسشىسى رەتىندە ۇستازداردى جان-جاقتى قولداۋ جۇمىسىنا ايرىقشا ءمان بەرەتىنىن جەتكىزدى.
- بارشاڭىزعا ءمالىم، ءبىز «پەداگوگ مارتەبەسى تۋرالى» ارنايى زاڭ قابىلدادىق. مەملەكەتتىك ماراپاتتار تىزىمىنە «قازاقستاننىڭ ەڭبەك سىڭىرگەن ۇستازى» اتاعى ەنگىزىلدى. ەلىمىزدە بىرنەشە مۇعالىم ەڭ جوعارى مەملەكەتتىك ناگرادا - «قازاقستاننىڭ ەڭبەك ەرى» اتاعىنا يە بولدى. 5-قازان كۇنى ۇستازداردىڭ كاسىبي مەرەكەسى رەتىندە ناقتى بەكىتىلدى. ءبىز جىل سايىن ءبىر قوعام بولىپ وسى مەيرامدى كەڭ كولەمدە اتاپ ءوتىپ ءجۇرمىز. بيىل دا مەرەكە كۇندەرى بارلىق ايماقتا اكىمدەر مۇعالىمدەر قاۋىمىن ماراپاتتاپ، ولارعا ەرەكشە قۇرمەت كورسەتىپ جاتىر. ۇستازداردى ءدال وسىلاي جالپىۇلتتىق دەڭگەيدە ۇلىقتاۋ ءىسى جالعاسىن تابادى. بۇل - مەملەكەتىمىز ءۇشىن ءمان-ماڭىزى ايرىقشا مىندەت، - دەدى پرەزيدەنت.
