پرەزيدەنت قىتاي بيزنەسىن ەلدەگى جاڭا جوبالارعا شاقىردى
استانا. KAZINFORM - مەملەكەت باسشىسى Sunwah Group ءتوراعاسى ساي گۋانشىندى قابىلدادى
پرەزيدەنت قاسىم-جومارت توقايەۆ قىتاي حالىقتىق ساياسي كونسۋلتاتيۆتىك كەڭەسى بۇكىل قىتايلىق كوميتەتىنىڭ تۇراقتى كوميتەت مۇشەسى، گونكونگتاعى قىتاي باس ساۋدا پالاتاسىنىڭ ءتوراعاسى، Sunwah Group كورپوراتسياسىنىڭ ءتوراعاسى ساي گۋانشىنمەن كەزدەستى.
مەملەكەت باسشىسى ىسكەرلىك ورتانىڭ 500 دەن استام وكىلى، سونىڭ ىشىندە 300 گە جۋىق قىتاي كاسىپكەرلەرى باس قوسقان الماتىداعى «قازاقستان - قىتاي» ينۆەستيتسيالىق فورۋمىن ۇيىمداستىرۋعا ساي گۋانشىننىڭ قوسقان ۇلەسىن جوعارى باعالادى.
- پرەزيدەنت فورۋمدى ەكى ەلدىڭ مەملەكەتتىك ورگاندارى، قارجى ينستيتۋتتارى مەن بيزنەس وكىلدەرى اراسىندا تىكەلەي بايلانىس ورناتاتىن تۇراقتى الاڭعا اينالدىرۋ ماڭىزدى ەكەنىنە نازار اۋداردى. مەملەكەت باسشىسىنىڭ ايتۋىنشا، نەگىزگى مىندەت - قول جەتكىزىلگەن ۋاعدالاستىقتاردى ىسكە اسىرۋ، ينۆەستيتسيالىق ىقپالداستىقتى كەڭەيتۋ جانە بىرلەسكەن جاڭا ءوندىرىس ورىندارىن قۇرۋ، - دەلىنگەن اقوردانىڭ باسپا ءسوز قىزمەتى تاراتقان حابارلامادا.
قاسىم-جومارت توقايەۆ ەكى ەل اراسىنداعى ىسكەرلىك قارىم-قاتىناستى ودان ءارى دامىتۋعا ايتارلىقتاي الەۋەت بار ەكەنىن اتاپ ءوتتى. بۇل رەتتە پرەزيدەنت گونكونگتاعى قىتاي باس ساۋدا پالاتاسىنا فورۋمنىڭ باستى ينستيتۋتسيونالدىق سەرىكتەستەرىنىڭ ءبىرى بولۋدى ۇسىندى.
مەملەكەت باسشىسى قازاقستان گونكونگپەن ىنتىماقتاستىقتى قىتايمەن سان قىرلى قارىم-قاتىناستىڭ ماڭىزدى بولىگى رەتىندە قاراستىراتىنىن ايتتى.
ساي گۋانشىن قاسىم-جومارت توقايەۆتىڭ قازاق-قىتاي ينۆەستيتسيالىق فورۋمىن جىل سايىن وتكىزۋ باستاماسىنا قولداۋ ءبىلدىردى. سونداي-اق ءوز تاراپىنان ءىس-شارانى ۇيىمداستىرۋ ىسىنە اتسالىسۋعا دايىن ەكەنىن جەتكىزدى.
بۇدان بولەك، قىتاي بيزنەسى قازاقستاننىڭ ينۆەستيتسيالىق كەلەشەگىنە تولىق سەنىم ارتاتىنىن جانە تىڭ باعىتتاردا جۇمىس ىستەۋگە نيەتتى ەكەنىن اتاپ ءوتتى. بۇل رەتتە جاساندى ينتەللەكت، سيفرلىق تەحنولوگيالار، قارجى ينفراقۇرىلىمى، ونەركاسىپتىك كووپەراتسيا، سونداي-اق Alatau City جوباسىنا قاتىسۋ ىنتىماقتاستىقتىڭ پەرسپەكتيۆتى سالالارى رەتىندە ايقىندالدى.
ەسكە سالايىق، بۇعان دەيىن قاسىم-جومارت توقايەۆ «قازاقستان - قىتاي» ينۆەستيتسيالىق فورۋمى اياسىندا بەينەبايلانىس رەجيمى ارقىلى جامبىل وبلىسىندا جۇگەرىنى تەرەڭ وڭدەۋ بويىنشا ونەركاسىپ پاركى قۇرىلىسىن باستاۋعا رۇقسات بەرگەنىن جازعانبىز.
