پرەزيدەنت قازاقستاندىقتاردى ەڭبەك كۇنىمەن قۇتتىقتادى

قۇرمەتتى وتانداستار!

سىزدەردى ەڭبەك كۇنىمەن قۇتتىقتايمىن!

بۇل - قارىم-قابىلەتىمەن، اقىل-پاراساتىمەن جانە قاجىرلى ەڭبەگىمەن قاستەرلى وتانىمىزدىڭ ءوسىپ-وركەندەۋىنە زور ۇلەس قوسىپ جۇرگەن ءتۇرلى ماماندىق يەلەرى ۇلىقتالاتىن، ولارعا قۇرمەت كورسەتىلەتىن مەرەيلى كۇن.

ءوز ءىسىن جەتىك مەڭگەرگەن كاسىبي مامان بولۋ - قازىرگى زاماننىڭ اسا ماڭىزدى تالابى. بىلىكتى، جاۋاپكەرشىلىگى جوعارى، ەڭبەكقور جانە ءتارتىپتى ازاماتتاردىڭ ارقاسىندا كوپتەگەن ەلدەر، سونىڭ ىشىندە قازاقستان دا الەۋمەتتىك-ەكونوميكالىق تۇرعىدان مول تابىسقا جەتۋدە.

الەم حالىقتارىنا ورتاق «ەڭبەك -ءبارىن جەڭبەك» ناقىل ءسوزىنىڭ ءمانى زور، ماعىناسى تەرەڭ. تاباندى ەڭبەك -جەتىستىككە جەتۋدىڭ كوزى. ادال نيەتپەن اتقارىلعان ءاربىر ءىس - قادىرلى، كەز كەلگەن ەڭبەك -زور قۇرمەتكە لايىق.

بۇگىنگى تاڭدا قازاقستان جاڭا تاريحي كەزەڭگە قادام باستى. الدىمىزدا اۋقىمدى مىندەتتەر تۇر. كونستيتۋتسيامىز جانە وندا ايقىن كورىنىس تاپقان ادىلەتتى قازاقستان، زاڭعا باعىنۋ، بىرلىك پەن ىنتىماق، ەڭبەكقورلىق پەن ىلگەرىلەۋ، تابيعاتقا قامقورلىقپەن قاراۋ يدەيالارى -ەلىمىزدىڭ تۇراقتى دامۋىنا جول اشاتىن تەمىرقازىق.

قازىر قوعامىمىزدا «ادال ادام - ادال ەڭبەك - ادال تابىس» اتتى جاڭا ەتيكا قالىپتاستى. بىلتىر جۇمىسشى ماماندىقتار جىلىن اتاپ وتتىك. بۇل باستاما ەڭبەك ادامىنىڭ قوعامداعى مارتەبەسىن ارتتىرىپ، تالىمگەرلىك ءداستۇرى مەن ەڭبەك اۋلەتتەرىنىڭ ءمان-ماڭىزىن نىعايتا تۇسۋگە تىڭ سەرپىن بەردى.

مەملەكەت الداعى ۋاقىتتا دا ازاماتتارىمىزدىڭ جان-جاقتى دامۋى ءۇشىن قولايلى جاعداي جاساي بەرەدى. جاستارعا كاسىبي ءبىلىم بەرۋ، ولاردىڭ ەڭبەك داعدىلارىن ۇشتاۋ، سونداي-اق، وسكەلەڭ ۇرپاقتىڭ بويىنا اعا بۋىننىڭ باي ومىرلىك تاجىريبەسى مەن تاعىلىمىن ءسىڭىرۋ - اسا ماڭىزدى مىندەت. جاستارى جاسامپاز ەلدىڭ بولاشاعى دا جارقىن، دامۋى دا قارقىندى بولارى ايقىن.

ءبىز ىنتىماعى جاراسقان، ماقسات-مۇددەسى ورتاق ءبىرتۇتاس ۇلت رەتىندە ادىلدىك، تابيعاتتى ايالاۋ، زاڭ ۇستەمدىگى، وركەندەۋ قۇندىلىقتارى جانە، ەڭ باستىسى، ەڭبەكقورلىق قاسيەتى ءىس جۇزىندە ورنىققان ەل بولامىز. مەن بۇعان كامىل سەنەمىن.

قۇرمەتتى وتانداستار، بارشاڭىزعا مىقتى دەنساۋلىق، اماندىق جانە تولاعاي تابىس تىلەيمىن!

ەلىمىز ءوسىپ-وركەندەي بەرسىن!