پرەزيدەنت: قازاقستان مەن ومان ينۆەستيتسيالىق مۇمكىندىكتەرىن بىرىكتىرەدى

قاسىم-جومارت توقايەۆ فورۋمدا سويلەگەن سوزىندە ءوزارا سەنىم مەن تۇسىنىستىك سيپاتىندا وتكەن جوعارى دەڭگەيدەگى كەلىسسوزدەردىڭ اشىق، وبەكتيۆتى ءارى شىن مانىندە مازمۇندى بولعانىن ايتتى.

مەملەكەت باسشىسى قازاقستان مەن ومان اراسىنداعى ساۋدا-ەكونوميكالىق جانە ينۆەستيتسيالىق بايلانىستاردى ىلگەرىلەتۋ ءۇشىن ءتيىستى كەلىسىمشارت-قۇقىق بازاسى مەن ينستيتۋتتىق نەگىزدەردى كۇشەيتۋ قاجەت ەكەنىن العا تارتتى.

پرەزيدەنت بۇل رەتتە ينۆەستيتسيالاردى كوتەرمەلەۋ تۋرالى كەلىسىمنىڭ ماڭىزىنا توقتالدى. اتالعان ۋاعدالاستىق اياسىندا جوبالاردى ىسكە اسىراتىن ينۆەستورلار اناعۇرلىم تۇسىنىكتى، اشىق ءارى سەنىمدى شارتتارمەن قامتاماسىز ەتىلگەن.

سونداي-اق ەكى ەلدىڭ ىسكەرلىك توپتارى اراسىنداعى تىكەلەي بايلانىستاردى دامىتۋعا ايرىقشا ءمان بەرىلدى.

- قازاقستان- ومان ىسكەرلىك كەڭەسى بيزنەس وكىلدەرى ءبىر-بىرىمەن بەلسەندى ارالاساتىن الاڭ بولاتىنىنا سەنىمدىمىن، - دەدى پرەزيدەنت.

مەملەكەت باسشىسىنىڭ پايىمداۋىنشا، ءتيىمدى قارجىلىق تەتىكتەر قازاقستان مەن وماننىڭ ورتاق ماقساتتارىن قۋاتتاي تۇسەدى.

- ءبىز «سامۇرىق- قازىنا» ا ق مەن ومان ينۆەستيتسيالىق باسقارماسى اراسىنداعى بىرلەسكەن ينۆەستيتسيالىق قۇرىلىمدى ىسكە قوسۋ تۋرالى كەلىسىمگە قول قويىلۋىن قۇپتايمىز. بۇل ماڭىزدى باستاما قارجىلىق مۇمكىندىكتەردى بىرىكتىرىپ، قوسىمشا ينۆەستيتسيا تارتۋعا مۇمكىندىك بەرەدى. سونداي-اق ءبىز وماننىڭ جاقىندا قۇرىلعان حالىقارالىق قارجى ورتالىعىمەن ىنتىماقتاستىقتى جولعا قويۋعا بولادى دەپ سانايمىز. ەكى ەل قارجى ينستيتۋتتارىنىڭ ءبىر-بىرىمەن تىكەلەي بايلانىس ورناتۋى ينۆەستيتسيالىق مۇمكىندىكتەرگە جول اشادى، - دەدى پرەزيدەنت.

ايتا كەتەيىك، بۇگىن ەلوردادا پرەزيدەنت قاسىم-جومارت توقايەۆتىڭ قازاقستانعا مەملەكەتتىك ساپارمەن كەلگەن ومان سۇلتانى حايسام بەن تاريق ءال سايدتى قارسى الۋ ءراسىمى ءوتتى.

كەيىن پرەزيدەنت قاسىم-جومارت توقايەۆ پەن ومان سۇلتانى حايسام بەن تاريق ءال سايد شاعىن قۇرامدا كەلىسسوز جۇرگىزدى.

توقايەۆ پەن ومان سۇلتانى اح ق و-نىڭ ينۆەستيتسيالىق مۇمكىندىكتەرىمەن تانىستى.