پرەزيدەنت قاسىم-جومارت توقايەۆ ۇ ق ش ۇ ۇجىمدىق قاۋىپسىزدىك كەڭەسىنىڭ وتىرىسىنا قاتىستى
استانا. KAZINFORM - ماسكەۋدە ۇ ق ش ۇ ۇجىمدىق قاۋىپسىزدىك كەڭەسىنىڭ كەزەكتى وتىرىسى ءوتتى. بۇل تۋرالى اقوردا حابارلادى.
سامميتكە قازاقستان پرەزيدەنتىمەن بىرگە رەسەي فەدەراتسياسىنىڭ پرەزيدەنتى ۆلاديمير پۋتين، بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو، قىرعىز رەسپۋبليكاسىنىڭ پرەزيدەنتى سادىر جاپاروۆ، تاجىكستان رەسپۋبليكاسىنىڭ پرەزيدەنتى ەمومالي راحمون، سونداي-اق ۇ ق ش ۇ باس حاتشىسى تاالاتبەك ماسادىكوۆ قاتىستى.
مەملەكەتتەر باسشىلارى ۇ ق ش ۇ اياسىنداعى ىقپالداستىقتىڭ نەگىزگى اسپەكتىلەرىن قاراستىرىپ، ۇيىمنىڭ 2026-جىلى اتقارعان قىزمەتىنىڭ ناتيجەسىنە باعا بەردى ءارى الداعى كەزەڭگە ارنالعان جۇمىستىڭ باستى باعىتتارىن ايقىندادى.
سونداي-اق پرەزيدەنتتەر حالىقارالىق جانە وڭىرلىك قاۋىپسىزدىكتىڭ وزەكتى ماسەلەلەرى جونىندە پىكىر الماستى.
قاسىم-جومارت توقايەۆ قوناقجايلىق تانىتقانى ءۇشىن ۆلاديمير پۋتينگە ريزاشىلىعىن ءبىلدىرىپ، رەسەي تاراپىنىڭ بيىل ۇ ق ش ۇ- عا وتە ناتيجەلى ءتوراعالىق ەتكەنىن اتاپ ءوتتى.
پرەزيدەنت حالىقارالىق تەرروريزممەن كۇرەس، ەسىرتكى زاتتارىنىڭ زاڭسىز اينالىمىنا قارسى ءىس-قيمىل، سونداي-اق جاساندى ينتەللەكت تەحنولوگياسىنىڭ ىقپالى ۇلعايىپ كەلە جاتقانىن ەسكەرە وتىرىپ، اقپاراتتىق قاۋىپسىزدىكتى نىعايتۋ باعىتتارى بويىنشا كۇش-جىگەر جۇمىلدىرۋ قاجەت ەكەنىنە نازار اۋداردى.
قازاقستان پرەزيدەنتى ءسوز سوڭىندا ۇ ق ش ۇ- عا ءتوراعالىق ەتەتىن تاجىكستاننىڭ كوشباسشىسى ەمومالي راحموندى قۇتتىقتاپ، وسى جاۋاپتى ميسسيانى اتقارۋدا ساتتىلىك تىلەدى.
جيىن قورىتىندىسى بويىنشا ۇجىمدىق قاۋىپسىزدىك كەڭەسىنىڭ بىرلەسكەن مالىمدەمەسى قابىلداندى.
سونىمەن قاتار ۇ ق ش ۇ- عا مۇشە مەملەكەتتەردىڭ ورتاق مۇددەسىنە ساي ۇجىمدىق قاۋىپسىزدىكتى ودان ءارى نىعايتۋدى كوزدەيتىن ءبىرقاتار قۇجاتقا قول قويىلدى.
ۇلكەن كرەمل سارايىندا ۇ ق ش ۇ ۇجىمدىق قاۋىپسىزدىك كەڭەسىنىڭ وتىرىسى باستالعانىن جازعان بولاتىنبىز.
