پرەزيدەنت قاسىم-جومارت توقايەۆ بەلگيالىقتار كورولى مەن پاتشايىمىن كۇتىپ الدى

ەلوردا اۋەجايىندا مارتەبەلى قوناقتاردى مەملەكەت باسشىسى قاسىم-جومارت توقايەۆ قارسى الدى.

سونىمەن بىرگە قارسى الۋ راسىمىنە قر پرەزيدەنتى اكىمشىلىگىنىڭ باسشىسى رومان سكليار، پرەمەر- مينيستر ورىنباسارى جاسلان ماديەۆ، ق ر سىرتقى ىستەر ءمينيسترى مۇحتار تىلەۋبەردى، استانا اكىمى جەڭىس قاسىمبەك جانە قۇرىلتاي ءتوراعاسىنىڭ ورىنباسارى دينارا زاكيەۆا قاتىستى.

كورولدىك جۇپ استانا اۋەجايىنا قازاقستاندىق Air Astana بورتىمەن كەلدى.

مەملەكەتتىك ساپار حاتتاماسىنا سايكەس، تراپ الدىندا قۇرمەت قاراۋىلى ساپ تۇزەدى.

سونداي-اق اۋەجايدا ەكى ەل باسشىلارى شاعىن قۇرامداعى كەلىسسوزدەر وتكىزىپ جاتىر.

ايتا كەتەيىك، 11-14-قازان كۇندەرى بەلگيالىقتار كورولى فيليپپ جانە پاتشايىم ماتيلدانىڭ قازاقستانعا مەملەكەتتىك ساپارى وتەدى.

ساپار باعدارلاماسى ءتورت نەگىزگى باعىتتى قامتيدى. ولار - اسا ماڭىزدى پايدالى قازبالار، جاساندى ينتەللەكت، دەنساۋلىق ساقتاۋ، سونداي-اق تاريح پەن مادەنيەت.

بەلگيادان قازاقستانعا 110 ادامنان تۇراتىن دەلەگاتسيا كەلەدى. ونىڭ قۇرامىندا ءتورت مينيستر، 25 كومپانيا باسشىسى، 10 ۋنيۆەرسيتەت رەكتورى جانە 13 جۋرناليست بار. دەلەگاتسيا قۇرامىنىڭ اۋقىمدى بولۋى بەلگيا تاراپىنىڭ الداعى ساپارعا جوعارى قىزىعۋشىلىق تانىتىپ وتىرعانىن كورسەتەدى.

ەۋروپالىق مونارحتار استانا مەن الماتىداعى مادەنيەت جانە عىلىم نىساندارىن ارالاپ، ەكى ەل اراسىنداعى ىنتىماقتاستىققا ارنالعان كەزدەسۋلەرگە قاتىسادى.

ساپار قورىتىندىسى بويىنشا بىرلەسكەن مالىمدەمە قابىلدانىپ، ءبىرقاتار قۇجاتقا قول قويىلادى.

بۇعان دەيىن Kazinform مەملەكەتتىك ساپاردىڭ كۇن تارتىبىندە قانداي ماڭىزدى شارالار جوسپارلانعانىن جازعان ەدى.