پرەزيدەنت: كىتاپ وقۋ - جاستاردى اقپارات تاسقىنىنا جۇتىلىپ كەتۋدەن ساقتايتىن رۋحاني قالقان

پرەزيدەنت وتكەن اپتادا استانادا جاساندى ينتەللەكت تاقىرىبىنا ارنالعان اۋقىمدى ءىس-شارالار وتكەنىنە توقتالدى.

- AI Digital Bridge-2026 فورۋمى، سونداي-اق بەلگىلى ماماندار مەن ساراپشىلاردىڭ قاتىسۋىمەن جاساندى ينتەللەكتىنى دامىتۋ جونىندەگى كەڭەستىڭ وتىرىسى بولدى. وسى وتىرىستا قازاقستاننىڭ اسا ماڭىزدى سالادا مول تابىسقا جەتكەنى اتالىپ ءوتتى. ءبىراق بۇل جايباراقات وتىرۋعا بولادى دەگەن ءسوز ەمەس. سەبەبى جاساندى ينتەللەكت پەن جاڭا تەحنولوگيالار وتە جوعارى قارقىنمەن دامىپ جاتىر. بۇل - ۋاقىت تالابى. بۇدان بولەك، ەلوردامىزدا تۇڭعىش رەت Astana AI Film فەستيۆالى ءوتتى. شىن مانىندە، بۇل - ناعىز وزىق يننوۆاتسيالىق ءىس-شارا دەپ ايتۋعا بولادى. ويتكەنى ءدال وسى وتە وزەكتى جانە ماڭىزدى شارا اياسىندا استانا قالاسىندا الەمدە العاش رەت جاساندى ينتەللەكتىنىڭ كينو ونەرىندەگى كورىنىسى پايدا بولدى. باسقاشا ايتساق، اتالعان فەستيۆال بۇرىننان قالىپتاسقان ءداستۇرلى كينو ءوندىرىسىنىڭ وزەكتىلىگى ازايا باستاعانىن كورسەتتى. ەندى فيلم تۇسىرۋمەن اينالىساتىن ماماندار شەنەۋنىكتەردىڭ، دەمەۋشىلەردىڭ جانە پروديۋسەرلەردىڭ قولداۋىنا تاۋەلدى بولماي، ءوز بەتىمەن تولىققاندى كينو تۋىندىسىن شىعارا الادى. سوندىقتان استانادا وتكەن بۇل ناعىز جاھاندىق اۋقىمداعى فيلم فەستيۆالىنە الەم جۇرتشىلىعى ايرىقشا نازار اۋداردى، - دەدى قاسىم-جومارت توقايەۆ.

الايدا پرەزيدەنت وزىق تەحنولوگيا داۋىرىندە كىتاپ وقۋدىڭ دا ءمان-ماڭىزىن ارتتىرۋىمىز قاجەت دەپ سانايدى. بۇل رەتتە مەملەكەت باسشىسى وسكەلەڭ ۇرپاققا وسى قۇندىلىقتى سىڭىرۋگە تۇتاس قوعام اتسالىسۋى قاجەت ەكەنىن ايتتى.

- حالقىمىزدىڭ اسىل پەرزەنتى ءابىش كەكىلبايەۆتىڭ «ادامدى ادام ەتكەن - كىتاپ، ادامزات ەتكەن - كىتاپحانا» دەگەن تاماشا ءسوزى بار. كىتاپ ءبىلىمپازدىققا، جاناشىرلىققا، پاراساتتىلىققا، ەڭبەكقورلىققا باۋليدى. كىتاپ وقۋ - ازاماتتاردى، اسىرەسە، جاستاردى ءۇستىرت ويلاۋدان جانە اقپارات تاسقىنىنا جۇتىلىپ كەتۋدەن ساقتاپ قالاتىن رۋحاني قالقان. سوندىقتان مەن بيىل مامىر ايىندا «كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى» جارلىققا قول قويدىم. بۇل مىندەتتى جۇزەگە اسىرۋ ءۇشىن ۇكىمەت جىل سوڭىنا دەيىن ءتيىستى تۇجىرىمداما قابىلدايدى، - دەدى قاسىم-جومارت توقايەۆ.