پرەزيدەنت COP17 اياسىنداعى كوشباسشىلار سامميتىنە قاتىسۋ ءۇشىن ەريەۆانعا باردى
ەريەۆان. KAZINFORM - پرەزيدەنت قاسىم-جومارت توقايەۆ ارمەنيا پرەمەر- ءمينيسترى نيكول پاشينياننىڭ شاقىرۋىمەن COP17 اياسىنداعى بيوالۋانتۇرلىلىك بويىنشا كوشباسشىلار سامميتىنە قاتىسۋ ءۇشىن ەريەۆانعا باردى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسىن اۋەجايدان ارمەنيا رەسپۋبليكاسى ۇكىمەتىنىڭ رەسمي تۇلعالارى كۇتىپ الدى.
ەسكە سالساق، كەشە مەملەكەت باسشىسى ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ 7-سامميتىنە قاتىسۋ ءۇشىن باكۋ قالاسىنا جۇمىس ساپارىمەن باردى.
بۇگىن قاسىم-جومارت توقايەۆ اوسشك VII سامميتىندە سوز سويلەدى. قازاقستان پرەزيدەنتى قوناقجايلىق كورسەتكەنى جانە سامميتتى جوعارى دەڭگەيدە ۇيىمداستىرعانى ءۇشىن ازەربايجان پرەزيدەنتى يلحام اليەۆكە العىس ايتتى.
شارا بارىسىندا توقايەۆ پريەۆەنتيۆتى ديپلوماتيا تەتىگىن ىسكە قوسۋدى ۇسىندى.
سامميتتەن كەيىن قاسىم-جومارت توقايەۆ قاتار ءامىرى شەيح ءتاميم بەن حاماد ءال تانيمەن كەزدەستى. سونداي-اق، مەملەكەت باسشىسى ازەربايجان پرەزيدەنتى يلحام اليەۆپەن كەزدەسۋ وتكىزدى.
بۇعان دەيىن قاسىم-جومارت توقايەۆ پەن ازەربايجان پرەزيدەنتى يلحام اليەۆ ترانسكاسپي تالشىقتى-وپتيكالىق بايلانىس جەلىسىن ىسكە قوسۋ راسىمىنە قاتىسقانىن جازعانبىز. پرەزيدەنتتەر كاسپي تەڭىزىنىڭ تابانى ارقىلى قازاقستان مەن ازەربايجاندى جالعاستىراتىن ۇزىندىعى 380 شاقىرىمدىق تالشىقتى-وپتيكالىق بايلانىس جەلىسىن سالتاناتتى تۇردە ىسكە قوستى.
