پرەزيدەنت بيوالۋانتۇرلىلىكتى ساقتاۋ جونىندەگى حالىقارالىق قور قۇرۋدى ۇسىندى

مەملەكەت باسشىسى قازاقستاننىڭ حالىقارالىق سيرەك تۇرلەردى قورعاۋ جانە بيوالۋانتۇرلىلىكتى ساقتاۋ جونىندەگى قور قۇرۋ تۋرالى باستاماسىنا توقتالدى، دەپ حابارلايدى اقوردانىڭ باسپا ءسوز قىزمەتى.

ول شەتەلدىك سەرىكتەستەردى اتالعان ىسكە ءۇن قوسۋعا شاقىردى.

- ون جىلعا ارنالعان بۇل باستامانى بيوالۋانتۇرلىلىكتى ساقتاۋ جونىندەگى ۇلتتىق باعدارلاما تولىقتىرا تۇسەدى. قۇجات تابيعي مەكەندەۋ ورتالارىن قالپىنا كەلتىرۋدى، تۇرلەردى قورعاۋدى جانە ەرەكشە قورعالاتىن تابيعي اۋماقتار جەلىسىن كەڭەيتۋدى كوزدەيدى. بۇدان بولەك، ۇلتتىق گەنەتيكالىق بيوالۋانتۇرلىلىك بانكىن قۇرۋعا كىرىستىك. قازاقستان ايماقتىق دەڭگەيدەگى تابيعاتتى ساقتاۋ شارالارىنا بەلسەنە قاتىسادى. بيىل ءساۋىر ايىندا استانادا وڭىرلىك ەكولوگيالىق سامميت ءوتتى. جيىن قورىتىندىسى بويىنشا ورتالىق ازياداعى ەكولوگيالىق ىنتىماقتاستىق جونىندەگى استانا دەكلاراتسياسى قابىلداندى. تەڭىز ماڭىنداعى بەس مەملەكەتتىڭ قولداۋىمەن قازاقستان كاسپي تەڭىزىنىڭ سۋ رەسۋرستارىن ساقتاۋعا باعىتتالعان حالىقارالىق باعدارلاما قابىلداۋ تۋرالى باستاما كوتەردى، - دەدى پرەزيدەنت.

سودان سوڭ قاسىم-جومارت توقايەۆ ورتاق ءىستىڭ بىرنەشە باعىتىن ايقىندادى. مەملەكەت باسشىسى سۋ رەسۋرستارىن باسقارۋدا بەرىك بايلانىس قاجەت دەپ سانايدى.

- وتكەن جىلى قازاقستان ب ۇ ۇ جۇيەسىندە حالىقارالىق سۋ ۇيىمىن قۇرۋدى ۇسىندى. بۇل باستاما ورتالىق ازيا ەلدەرىنە ورتاق ءارى وعان مۇددەلەس مەملەكەتتەردىڭ بارلىعى ءۇن قوسا الادى. ماقساتىمىز - سۋ قاۋىپسىزدىگىن نىعايتىپ، وزەن-كولدەر مەن سۋلى-باتپاقتى القاپتاردىڭ جاي-كۇيىنە تاۋەلدى تابيعي ەكوجۇيەلەردى قورعاۋ، - دەدى ول.

بۇدان بۇرىن پرەزيدەنت «تازا قازاقستان» اكسياسى جالپىۇلتتىق يدەولوگياعا اينالىپ كەلە جاتقانىن ايتتى.