پرەزيدەنت بەلگيالىقتار كورولىمەن جانە پاتشايىمىمەن كەڭەيتىلگەن قۇرامدا كەلىسسوز جۇرگىزدى
استانا. KAZINFORM - مەملەكەت باسشىسى قاسىم-جومارت توقايەۆ بەلگيالىقتار كورولىمەن جانە پاتشايىمىمەن كەڭەيتىلگەن قۇرامدا كەلىسسوز جۇرگىزدى.
اقوردادا وتكەن كەلىسسوز بارىسىندا پرەزيدەنت قازاقستان مەن ورتالىق ازياعا تاريحتا تۇڭعىش رەت مەملەكەتتىك ساپارمەن كەلگەن بەلگيالىقتار كورولىنە جانە پاتشايىمىنا ءىلتيپات ءبىلدىردى.
- وسى تاريحي ساتتە سىزدەرمەن جۇزدەسىپ، مەملەكەتتەرىمىز اراسىنداعى بەرىك دوستىقتى اتاپ ءوتۋ - مەن ءۇشىن زور مارتەبە. اسا مارتەبەلى كورول فيليپپ، حالقىڭىزعا قالتقىسىز قىزمەتىڭىزدى جوعارى باعالايمىز. ءسىز كورولدىك بيلىگىنە كەلگەلى ەلىڭىز وركەندەپ، الەمدىك ارەناداعى لايىقتى ورنىن بەكىتە ءتۇستى. حالقىڭىزعا ادالدىعىڭىز جانە بەلگيانى مەكەندەيتىن ءتۇرلى قاۋىمدار اراسىنداعى ءوزارا تۇسىنىستىكتى نىعايتۋ جولىنداعى تاباندى ەڭبەگىڭىز ءتاجدىڭ ەل بىرلىگىن ساقتاۋداعى ءرولىن ايقىنداي تۇسەدى، - دەدى قاسىم-جومارت توقايەۆ.
ءوز سوزىندە پرەزيدەنت «بىرلىگىمىز - ءارالۋاندىقتا» دەگەن قاعيداتقا ايرىقشا ءمان بەرەتىنىن، ءاربىر ازاماتتىڭ كەلەشەك ءۇشىن اتسالىسقانىن قالايتىنىن اتاپ ءوتتى.
- كوپ جىلدان بەرى كاسىپكەرلىكتى، ءبىلىم مەن يننوۆاتسيانى دامىتۋعا ەرەكشە كۇش سالىپ كەلەسىز. بۇل - شىن مانىندە ۇلگى تۇتارلىق ىزگى ىستەر. كورول اۋلەتىنىڭ بەلگيا بيزنەسىنە ۇدايى قولداۋ كورسەتۋى شەكسىز قۇرمەتكە لايىق. اسا مارتەبەلى پاتشايىم ماتيلدا، ءسىز بۇل ساپاردىڭ ءمان- مازمۇنىن ارتتىرىپ، شىرايىن كەلتىردىڭىز. ءسىزدىڭ بالالاردى قورعاۋ، ءبىلىم بەرۋ، ادامنىڭ ءقادىر- قاسيەتىن قۇرمەتتەۋ ماسەلەلەرىنە كەلگەندە، ەرەكشە جاناشىرلىعىڭىز بەن قامقورلىعىڭىزعا ءتانتىمىز. بۇل يگى مۇراتتار ازاماتتارىمىزدى شىن مانىندە سۇيسىنتەدى، - دەدى مەملەكەت باسشىسى.
ايتا كەتەيىك، 11-14-قازان كۇندەرى بەلگيالىقتار كورولى فيليپپ جانە پاتشايىم ماتيلدانىڭ قازاقستانعا مەملەكەتتىك ساپارى وتەدى. ساپار باعدارلاماسى ءتورت نەگىزگى باعىتتى قامتيدى. ولار - اسا ماڭىزدى پايدالى قازبالار، جاساندى ينتەللەكت، دەنساۋلىق ساقتاۋ، سونداي-اق تاريح پەن مادەنيەت.
بۇگىن قاسىم-جومارت توقايەۆ بەلگيالىقتار كورولى فيليپپ پەن ماتيلدا پاتشايىمدى اقوردادا قارسى الدى.
وسىعان دەيىن قاسىم-جومارت توقايەۆ بەلگيا - قازاقستاننىڭ ەۋروپاداعى سەنىمدى سەرىكتەسى ەكەنىن ايتقان بولاتىن.
