پرەزيدەنت ازيا ويىندارى جانە ازيا پاراويىندارىنىڭ جۇلدەگەرلەرىن ماراپاتتادى

مەملەكەت باسشىسى جيىندا سويلەگەن سوزىندە قازاقستان سپورتشىلارى جاپونيادا وتكەن ⅹⅹجازعى ازيا ويىندارى مەن V ازيا پارا ويىندارىندا تاماشا ناتيجە كورسەتىپ، ەلىمىزدىڭ مارتەبەسىن اسىرعانىن ايتتى.

- بۇل - مەملەكەتىمىز ءۇشىن شىن مانىندە ۇلكەن جەتىستىك جانە زور ماقتانىش! بارشاڭىزعا جارقىن جەڭىستەرىڭىز قۇتتى بولسىن دەيمىن! سىزدەر قۇرلىقتىڭ ەڭ مىقتى سپورتشىلارى قاتىسقان ءدۇبىرلى دودا كەزىندە ەل نامىسىن قورعاپ، جۇزدەن جۇيرىك شىقتىڭىزدار! ۇلتتىق قۇرامانىڭ تاباندى ەڭبەگىنىڭ ارقاسىندا ازيادا تورىندە رۋحتى ءانۇرانىمىز شىرقالدى، كوك تۋىمىز بيىكتە جەلبىرەدى. مەن ءاربىر جەڭىستى ناعىز پاتريوتيزمنىڭ ايقىن كورىنىسى دەپ سانايمىن. تۇتاس حالقىمىز سىزدەرگە قولداۋ كورسەتتى، جانكۇيەر بولدى. ءار سپورتشىنىڭ ەل قورجىنىنا قوسقان مەدالى ازاماتتارىمىزعا، اسىرەسە، ءوسىپ كەلە جاتقان جاس بۋىنعا ۇلكەن شابىت بەرەدى، ولاردى مىقتى، كۇشتى بولۋعا ۇندەيدى جانە العا جەتەلەيدى. بۇگىن وسى مەرەيلى ساتتە مەن مەملەكەت باسشىسى رەتىندە بارشاڭىزعا تاعى دا شىنايى ريزاشىلىعىمدى بىلدىرەمىن، - دەدى پرەزيدەنت.

ايتا كەتەيىك، جاپونيادا وتكەن XX جازعى ازيا ويىندارى اياقتالادى. قازاقستان قۇراماسى 84 مەدال (12 التىن، 24 كۇمىس جانە 48 قولا) ولجالاپ، 46 ەلدىڭ ىشىندە جالپىكوماندالىق ەسەپتە 8-ورىنعا تۇراقتادى.

ال ازيا پاراويىندارىندا قازاقستان 50 مەدال جەڭىپ الىپ، ۇزدىك وندىققا ەندى.