پرەزيدەنت 2040-جىلعا قاراي كاسپي ارقىلى جۇك تاسىمالى ءتورت ەسە ۇلعاياتىنىن ايتتى
استانا. KAZINFORM - پرەزيدەنت دۇنيەجۇزىلىك بانكتىڭ باعالاۋىنشا، جوسپارلانعان ينفراقۇرىلىمدىق مىندەتتەر تولىق جۇزەگە اسىرىلسا، 2040-جىلعا قاراي كاسپي ارقىلى جۇك تاسىمالى ءتورت ەسە ۇلعاياتىنىن ايتتى، دەپ حابارلايدى اقوردا.
- ورتا ءدالىزدى TRIPP كولىك باستاماسىمەن ۇشتاستىرۋ ماسەلەسىن ساراپشىلار دەڭگەيىندە تالقىلاۋعا بولادى دەپ ويلايمىن. بۇل جوبا الەۋەتىمىزدى ارتتىرادى ءارى بارلىق مەملەكەتتىڭ ۇزاقمەرزىمدى مۇددەسىنە ساي كەلەدى، - دەدى قاسىم-جومارت توقايەۆ.
پرەزيدەنتتىڭ پىكىرىنشە، سۋ پروبلەماتيكاسى - ورتالىق ازيا تۇراقتىلىعىنا قاتەر توندىرەتىن باستى سىناقتاردىڭ ءبىرى.
- الدىمىزدا ترانسشەكارالىق سۋ رەسۋرستارىن باسقارۋدىڭ تىڭ تاسىلدەرىن ازىرلەۋ مىندەتى تۇر. بۇل جۇمىستا ءوزارا قۇرمەت، تەڭقۇقىلىق قاعيداتتارى نەگىزگە الىنىپ، ايماقتاعى بارلىق ەلدىڭ مۇددەسى ەسكەرىلۋى كەرەك. ورتالىق ازيانىڭ سۋ پايدالانۋ بويىنشا نەگىزدەمەلىك كونۆەنتسياسىن قابىلداۋ ىنتىماقتاستىقتىڭ جاڭا وڭىرلىك ارحيتەكتۋراسىن قالىپتاستىراتىن العاشقى قادام بولار ەدى. قۇجات جوباسى تاراپتاردىڭ قاراۋىنا ۇسىنىلدى. بۇۇ اياسىندا حالىقارالىق سۋ ۇيىمىن قۇرۋ باستاماسى وتە وزەكتى. ونى حالىقارالىق، اتاپ ايتقاندا، ورتالىق ازيانىڭ ورتاق ۇستانىمى رەتىندە بىرگە ىلگەرىلەتۋ سۋ رەسۋرستارىن باسقارۋدىڭ جاھاندىق جۇيەسىنە قوسقان ۇلەسىمىز بولماق، - دەدى پرەزيدەنت.
ايتا كەتەيىك، قاسىم-جومارت توقايەۆ جۇمىس ساپارىمەن تۇرىكمەنستانعا باردى.
