پرەزيدەنتتىڭ تەننيس ويناپ جاتقان ۆيدەوسى قىتايدا 1 ميلليون رەت قارالدى
استانا. قازاقپارات - Kazinform حالىقارالىق اگەنتتىگىنىڭ الەۋمەتتىك جەلىسىندە جاريالانعان ق ر پرەزيدەنتى قاسىم-جومارت توقايەۆتىڭ ۇستەل تەننيسىن ويناپ جاتقان ۆيدەوسى قىتايدا 1 ميلليوننان استام رەت قارالعان.
بيىل قاراشا ايىنىڭ باسىندا مەملەكەت باسشىسى فرانسياعا مەملەكەتتىك ساپارمەن باردى. وسى كەزەڭدە فرانسيا پرەزيدەنتى ەممانيۋەل ماكرون پرەزيدەنت قاسىم-جومارت توقايەۆتىڭ ساپارىن قارسى الۋ ءۇشىن مەملەكەتتىك قابىلداۋ وتكىزدى.
سالتاناتتى كەش سوڭىندا ەممانيۋەل ماكرون قاسىم-جومارت توقايەۆقا ۇستەل تەننيسىنەن پاريج وليمپياداسىنىڭ قولا جۇلدەگەرى الەكسيس لەبرەندى تانىستىردى.
مەملەكەت باسشىسىنىڭ پاريجدە ۇستەل تەننيسىن ويناپ جاتقانى جايىندا تۇسىرىلگەن بۇل ۆيدەو Kazinform-نىڭ «WeChat Video» پلاتفورماسىندا جاريالانعاننان كەيىن 1 ميلليوننان استام رەت قارالدى.
وسى ۋاقىتقا دەيىن ۆيدەو 1,053 ميلليون رەت قارالىپ، 3023 «لايك» پەن جۇزدەگەن پىكىر جيناعان.
كەيبىر قىتايلىق كورەرمەندەر قازاقستان پرەزيدەنتىنىڭ ۇستەل تەننيسىندەگى شەبەرلىگى وتە جاقسى جانە كاسىبي ويىنشىلارمەن تەڭ دارەجەدە بولعانىن ايتسا، وعان باسقالارى توقايەۆتىڭ ءبىر كەزدەرى قىتايدا جۇمىس ىستەگەنىن، سوندىقتان ونىڭ ۇستەل تەننيسىمەن اينالىسۋى قالىپتى جاعداي ەكەنىن اتاپ ءوتتى.
ۇستەل تەننيسى قىتايدا وتە تانىمال سپورت ءتۇرى، ءتىپتى ونى قىتايدىڭ «ۇلتتىق سپورتى» رەتىندە سانايدى.
ايتا كەتەيىك، توقايەۆ قازاقستان ۇستەل تەننيسى فەدەراتسياسىنىڭ ءتوراعاسى قىزمەتىن 13 جىل قاتارىنان اتقارعان.
اۆتور
مۇقتار مۇرات
