پرەزيدەنتكە مەملەكەتتىك شەكارانى قورعاۋعا جانە كۇزەتۋگە قاتىستى اقپارات بەرىلدى
استانا. KAZINFORM - مەملەكەت باسشىسى ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆتى قابىلدادى، دەپ حابارلايدى اقوردا.

پرەزيدەنتكە ۆەدومستۆونىڭ الداعى كەزەڭگە ارنالعان جوسپارى، سىن-قاتەرلەردى ەسكەرە وتىرىپ ۇلتتىق قاۋىپسىزدىكتى قامتاماسىز ەتۋ بويىنشا قابىلدانىپ جاتقان شەشىمدەرى تۋرالى باياندالدى.
ۇ ق ك ءتوراعاسى ۇلتتىق قاۋىپسىزدىك ورگاندارىن پەرسپەكتيۆتى دامىتۋ باعىتىندا جۇزەگە اسىرىلىپ جاتقان شارالار، جەدەل قىزمەتتىك ءىس-قيمىلدى ۇيىمداستىرۋ جانە ونىڭ قۇرىلىمىن جەتىلدىرۋ جونىندە مالىمەت بەردى.
قاسىم-جومارت توقايەۆقا ارنايى قىزمەتتى كادرلىق جانە تەحنيكالىق تۇرعىدان نىعايتۋ، نورماتيۆتىك-قۇقىقتىق بازانى جاڭعىرتۋ، سونداي-اق ۇلتتىق قاۋىپسىزدىك كوميتەتىندەگى ۇدەرىستەردى وڭتايلاندىرۋ مەن سيفرلاندىرۋ جۇمىستارى جايىندا ايتىلدى.
سونىمەن قاتار مەملەكەت باسشىسىنا حالىقارالىق تەرروريزمگە جانە ءدىني ەكسترەميزمگە، ۇيىمداسقان قىلمىسقا، ەسىرتكى بيزنەسىنە قارسى تۇرۋ، كيبەرقاۋىپسىزدىكتى قامتاماسىز ەتۋ، مەملەكەتتىك شەكارانى قورعاۋ جانە كۇزەتۋ سالالارىنداعى جاعداي تۋرالى اقپارات بەرىلدى.
كەزدەسۋ سوڭىندا پرەزيدەنت ۇلتتىق قاۋىپسىزدىك ورگاندارى قىزمەتىنىڭ نەگىزگى باعىتتارى بويىنشا ءبىرقاتار تاپسىرما بەردى.
بۇعان دەيىن مەملەكەت باسشىسى ادىلەت ءمينيسترى ەرلان سارسەمبايەۆتى قابىلداعانىن جازدىق.
سونىمەن قاتار، پرەزيدەنت بەلگىلى جازۋشى تولەن ابدىككە جەدەلحات جولداعانى حابارلاندى.
اۆتور
اينۇر تۋماكبايەۆا