انتيكوردا كريميناليستىك باسقارما اشىلادى

استانا. KAZINFORM - سىبايلاس جەمقورلىققا قارسى ءىس-قيمىل اگەنتتىگى قۇرىلىمىندا كريميناليستىك باسقارما اشۋ ۇسىنىلدى. بۇل تۋرالى جارلىقتىڭ جوباسى «اشىق ن ق ا» پورتالىندا جاريالاندى.

 

انتيكورعا كريميناليستىك باسقارما نە ءۇشىن قاجەت:

- سىبايلاس جەمقورلىققا قارسى قىزمەتتىڭ ءۇشىنشى تۇلعالار جانە ۇيىمدارمەن قىلمىستىق ارەكەتتەر ارقىلى كەلتىرىلەتىن اۋىر زالالدى راستايتىن تەكسەرۋ اكتىلەرىنىڭ تاۋەلسىزدىگىن قامتاماسىز ەتۋ؛

- جەكە مامانداردى تارتۋعا بيۋدجەت شىعىنىن تومەندەتۋ، جەدەل جانە سوتقا دەيىنگى تەرگەۋ مەرزىمىن قىسقارتۋ؛

- قۇپيا اقپاراتتىڭ اشىلۋ تاۋەكەلدەرىن بولدىرماۋ.

وسى ورايدا جارلىق جوباسىندا كريميناليستىك قۇزىرەتتى اكىمشىلىك عيماراتتا وتكىزۋ جانە وبەكتى ىشىندەگى رەجيمدى قامتاماسىز ەتۋ ءتارتىبىن ازىرلەۋ جانە بەكىتۋ بويىنشا سىبايلاس جەمقورلىققا قارسى ءىس-قيمىل اگەنتتىگىنىڭ فۋنكتسياسىن قاراستىرۋ قاجەتتىگى ايتىلعان.

- قىلمىستىق- پروتسەستىك كودەكستىڭ 80-بابىنا سايكەس قۇقىق قورعاۋ نەمەسە ارناۋلى مەملەكەتتىك ورگاننىڭ ۋاكىلەتتى بولىمشەسىنىڭ قىزمەتكەرىن زەرتتەۋ جۇرگىزۋ جانە قورىتىندى بەرۋ ءۇشىن مامان رەتىندە تارتۋعا جول بەرىلەتىندىكتەن، بۇل ۇسىنىس قىلمىستىق- پروتسەستىك زاڭناماعا قايشى كەلمەيدى، - دەلىنگەن قۇجاتتا.

قۇجات جوباسى 27 - جەلتوقسانعا دەيىن جۇرتشىلىقتىڭ تالقىسىنا ۇسىنىلىپ وتىر.

بۇعان دەيىن انتيكور كەلەر جىلدان باستاپ «ا» كورپۋسىنا جاتاتىن ساياسي مەملەكەتتىك قىزمەتشىلەردىڭ، مەملەكەتتىك اكىمشىلىك قىزمەتشىلەردىڭ ادام قۇقىقتارى جونىندەگى ۋاكىلدىڭ، پارلامەنت دەپۋتاتتارىنىڭ، سۋديالاردىڭ، كۆازيمەملەكەتتىك سەكتورداعى لاۋازىمدى تۇلعالار مەن ولاردىڭ جارىنىڭ كىرىستەرى مەن مۇلكى تۋرالى دەكلاراتسيا قوعامعا اشىق جاريالاناتىنىن حابارلادى.

داۋلەت ىزتىلەۋ

اۆتور