پرەزيدەنت ىشكى ىستەر ءمينيسترى ەرجان سادەنوۆتى قابىلدادى

Президент РК поручил повысить уровень правопорядка и общественной безопасности в стране
Фото: Акорда

استانا. KAZINFORM - مەملەكەت باسشىسى قاسىم-جومارت توقايەۆ ىشكى ىستەر ءمينيسترى ەرجان سادەنوۆتى قابىلدادى. ول ەلىمىزدەگى كريمينوگەندىك احۋال تۋرالى مالىمەت بەردى. بۇل تۋرالى اقوردانىڭ باسپا ءسوز قىزمەتى مالىمدەدى.

ەرجان سادەنوۆ ەلىمىزدەگى كريمينوگەندىك احۋال تۋرالى مالىمەت بەردى. جىل باسىنان بەرى قىلمىس دەڭگەيى تومەندەگەن. ۇرلىق، توناۋ، قاراقشىلىق، بۇزاقىلىق، سونداي- اق تۇرمىستىق زورلىق- زومبىلىق، ماس كۇيىندە جانە كوشەلەردە جاسالاتىن قۇقىق بۇزۋشىلىقتاردىڭ سانى ايتارلىقتاي ازايعان؛

قىلمىسكەرلەردى ىزدەستىرۋ جۇمىسىنىڭ ناتيجەسى تۋرالى باياندادى. جىل باسىنان بەرى 782 ادام، ونىڭ ىشىندە 79 ازامات شەتەلدە ۇستالعان. ىزدەۋدە جۇرگەن 16 ادام ەلگە ەكستراديتسيالانعان؛

ادام كوپ جينالاتىن جەرلەردە ازاماتتاردىڭ قاۋىپسىزدىگىن قامتاماسىز ەتۋ جونىندە اقپارات بەردى. تەرروريستىك ارەكەت تۇرعىسىنان العاندا وسال ەكى مىڭنان استام نىسان، سونىڭ ىشىندە مەكتەپتەر، جوعارى وقۋ ورىندارى، ساۋدا جانە ويىن-ساۋىق ورتالىقتارى، كونسەرت زالدارى مەن باسقا دا تاريحي-مادەني عيماراتتار تەكسەرىلگەن؛

كوشى-قون ءىسىن باقىلاۋ جۇمىستارى جايىندا ەسەپ بەردى. جىل باسىنان بەرى ەلىمىزگە 4,2 ميلليون شەتەل ازاماتى كەلىپ، ونىڭ 4 ميلليونعا جۋىعى شەكارادان كەرى شىققان. ولاردىڭ 90 پايىزى - ت م د ازاماتتارى؛

ۇيىمداسقان، كيبەر جانە ەسىرتكى قىلمىستارىنا قارسى ءىس-قيمىل جونىندەگى، سونداي-اق قۇقىق بۇزۋشىلىقتاردىڭ، ونىڭ ىشىندە تۇرمىستىق زورلىق-زومبىلىقتىڭ الدىن الۋ، سۋ تاسقىنى سالدارىن جويۋ، جول قاۋىپسىزدىگىن قامتاماسىز ەتۋ، كەزەكتەن تىس اتتەستاتسيالاۋ باعىتتارىنداعى تاپسىرمالارىنىڭ ورىندالۋ بارىسىن تانىستىردى؛

كوشەلەردەگى قاۋىپسىزدىك دەڭگەيىن ارتتىرۋ جانە قۇقىق بۇزۋشىلىقتارعا مۇلدە توزبەۋشىلىك قاعيداتىن قامتاماسىز ەتۋ ءۇشىن قابىلدانىپ جاتقان شارالار تۋرالى ايتتى.

قاسىم-جومارت توقايەۆ ەلىمىزدەگى قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ جونىندە ءبىرقاتار تاپسىرما بەردى.

اۆتور

باقىتگۇل اباي قىزى

سوڭعى جاڭالىقتار