پرەزيدەنت ورتالىق ازيا مەملەكەتتەرى باسشىلارىنىڭ، گ ف ر كانسلەرى جانە گەرمانيانىڭ ءىرى بيزنەس وكىلدەرىنىڭ كەزدەسۋىنە قاتىستى
استانا. KAZINFORM - قاسىم-جومارت توقايەۆ فەدەرالدىق كانسلەر ولاف شولتسكە، ورتالىق ازيا ەلدەرىنىڭ پرەزيدەنتتەرى مەن نەمىس كومپانيالارىنىڭ باسشىلارىنا ءىلتيپات بىلدىرە وتىرىپ، «ورتالىق ازيا -گەرمانيا» فورماتىنداعى ەكىنشى كەزدەسۋ سانقىرلى سەرىكتەستىكتى دامىتۋدىڭ جاڭا كەزەڭىنە جول اشقانىن اتاپ ءوتتى، دەپ حابارلايدى اقوردانىڭ باسپا ءسوز قىزمەتى.
قازاقستان پرەزيدەنتىنىڭ ايتۋىنشا، جان-جاقتى پىكىر الماسۋلار مەملەكەتتەر باسشىلارىنىڭ ىنتىماقتاستىقتى ودان ءارى تەرەڭدەتۋگە نيەتتى ەكەنىن راستايدى.
- گەرمانيا مەن وڭىردەگى مەملەكەتتەردىڭ اراسىنداعى بايلانىسقا ۇدايى دانەكەر بولىپ كەلە جاتقانى ءۇشىن گەرمانيا ەكونوميكاسى شىعىس كوميتەتىنە ەرەكشە العىس ايتامىن. گەرمانيا -ەكونوميكالىق جانە تەحنولوگيالىق يننوۆاتسيا سالاسىندا الەمدىك كوشباسشىلاردىڭ ءبىرى. بۇل ەلدىڭ ونىمدەرى ءوزىنىڭ ساپاسىمەن ايگىلى. ال ورتالىق ازيا - قارقىندى دامىپ كەلە جاتقان، الەۋەتى وراسان زور ءارى ءوزارا ءتيىمدى سەرىكتەستىككە مول مۇمكىندىك اشاتىن ايماق. ورتالىق ازيا - شىعىس پەن باتىستىڭ، سولتۇستىك پەن وڭتۇستىكتىڭ اراسىن جالعايتىن التىن كوپىر. سوندىقتان تەحنولوگيانى ترانسفەرتتەۋ، ءوندىرىستى لوكاليزاتسيالاۋ جانە قوسىلعان قۇنى جوعارى ءونىم شىعارۋ ءىسىنىڭ ورتالىعى بولا الادى. وسى تۇرعىدان العاندا، ءتۇرلى سالادا ىنتىماقتاستىق ورناتۋعا دايىنبىز. اسا قاجەتتى شيكىزاتتى يگەرۋ، ەنەرگەتيكا، كولىك جانە لوگيستيكا، قارجى، اۋىل شارۋاشىلىعى مەن اقپاراتتىق تەحنولوگيا سياقتى سالالارداعى كووپەراتسيانى ودان ءارى نىعايتۋدىڭ پەرسپەكتيۆاسى مول، - دەدى مەملەكەت باسشىسى.
پرەزيدەنت كەزدەسۋگە قاتىسۋشىلار دوستىق جانە سىندارلى سيپاتتا ءوزارا ىنتىماقتاستىقتى ودان ءارى نىعايتۋ جولدارىن تالقىلاۋعا مۇمكىندىك العانىن ايتتى. قاسىم-جومارت توقايەۆ يدەيا مەن تاجىريبە الماسۋ وڭىردەگى مەملەكەتتەردىڭ جان-جاقتى دامۋىنا ىقپال ەتەتىنىنە سەنىم ءبىلدىردى.
ءسوزىنىڭ سوڭىندا مەملەكەت باسشىسى اشىق جانە مازمۇندى ديالوگ ءۇشىن كەزدەسۋ قاتىسۋشىلارىنا العىس ايتتى.
- ءبىزدىڭ جان-جاقتى تالقىلاۋلارىمىز ورتالىق ازيا مەن گەرمانيا اراسىنداعى ەكونوميكالىق ىنتىماقتاستىقتىڭ ءتۇرلى سالادا مول الەۋەتكە يە ەكەنىن كورسەتتى. ءوڭىرارالىق ەكونوميكالىق كووپەراتسياعا تىڭ سەرپىن بەرەتىن اۋقىمدى ماسەلەلەردى قاراستىردىق. ونىڭ ىشىندە، ينفراقۇرىلىم مەن ەنەرگەتيكادان باستاپ تەحنولوگيا مەن يننوۆاتسياعا دەيىنگى سالالار قامتىلدى، - دەدى قازاقستان پرەزيدەنتى.
قاسىم-جومارت توقايەۆ جيىندا ايتىلعان ەكونوميكالىق كەڭەس قۇرۋ تۋرالى ۇسىنىستى قولدادى. اتالعان ورگان نەمىس ينۆەستيتسياسىن تارتۋدا جانە ورتالىق ازيا مەملەكەتتەرى مەن گەرمانيا اراسىنداعى ءوزارا ىقپالداستىقتىڭ ورنىقتى ينستيتۋتسيونالدىق بازاسىن قالىپتاستىرۋدا بەلسەندى ءرول اتقارا الادى.
جيىندا گ ف ر فەدەرالدىق كانتسلەرى ولاف شولتس، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ، وزبەكستان پرەزيدەنتى شاۆكات ميرزيەۆ، سونداي- اق Siemens Energy AG كومپانياسىنىڭ باسقارما ءتوراعاسى، گەرمانيا ەكونوميكاسى شىعىس كوميتەتى ءتوراعاسىنىڭ ورىنباسارى كريستيان برۋح، KNAUF Gruppe كومپانياسىن باسقارۋشى سەرىكتەستەردىڭ وكىلى الەكساندر كناۋف، Ernst Klett AG كومپانياسىنىڭ باس اتقارۋشى ديرەكتورى فيليپپ حاۋسمانن، DB E. C. O. Group كومپانياسىنىڭ اتقارۋشى كەڭەسىنىڭ ءتوراعاسى، گەرمانيا ەكونوميكاسى شىعىس كوميتەتىنىڭ ورتالىق ازيا جونىندەگى جۇمىس توبىنىڭ وكىلى نيكو ۆاربانوفف، Siemens Healthineers AG كومپانياسىنىڭ باسقارما ءتوراعاسى بەرندت مونتاگ، CLAAS Group كومپانياسىنىڭ باسقارما ءتوراعاسى يان-حەندريك مور ءسوز سويلەدى.
اۆتور
ەلميرا ورالبايەۆا
