پرەزيدەنت ورتالىق ازيا ەلدەرىن قورعانىس ساياساتىندا بىرلەسىپ ارەكەت ەتۋگە شاقىردى
استانا. KAZINFORM - قازاقستان شەكارانىڭ تۇتاستىعىنا قول سۇقپاۋ قاجەت دەگەن ۇستانىمىنان اينىمايدى. بۇل جونىندە پرەزيدەنت قاسىم-جومارت توقايەۆ «ەگەمەن قازاقستان» گازەتىنە جاريالاعان ماقالاسىندا ايتقان.
«ورتالىق ازيادا عانا ەمەس، سونىمەن قاتار ىرگەلەس جاتقان ايماقتاردا دا بەيبىتشىلىك پەن تۇراقتىلىقتى ساقتاۋ - ۇزاق مەرزىمگە ارنالعان وركەندەۋ مەن دامۋدىڭ ماڭىزدى العىشارتى. قازاقستاننىڭ سىرتقى ساياساتىنداعى باسىم باعىتتىڭ ءبىرى - تەپە- تەڭدىكتى ساقتاۋعا ۇمتىلۋ. ءبىز ءاردايىم «بەيبىتشىلىك بارىنەن قىمبات» دەگەن قاعيدانى ۇستانامىز. قازاقستان الەم قوعامداستىعىنىڭ جاۋاپتى مۇشەسى رەتىندە حالىقارالىق قۇقىق قاعيداتتارىن قاتاڭ ساقتاۋ، ەگەمەندىكتى قۇرمەتتەۋ جانە شەكارانىڭ تۇتاستىعىنا قول سۇقپاۋ قاجەت دەپ سانايدى. قازاقستاننىڭ بۇل پايىمىمەن كەلىسەتىن ەلدەر از ەمەس دەپ سەنىممەن ايتا الامىن. كوپتەگەن ەلدىڭ ۇستانىمدارى ءبىر-بىرىنە ۇقسايدى. ونىڭ ءبارى ءادىل ءارى بولجاۋعا بولاتىن الەمدىك ءتارتىپ ورناتۋعا نەگىزدەلگەن. بۇل ۇستانىم قازىرگى بەيمازا زاماندا بولاشاق تۋرالى سىندارلى كوزقاراس قالىپتاستىرۋعا جول اشادى»، - دەپ جازادى اۆتور.
قاسىم-جومارت توقايەۆ بۇل ءوڭىردىڭ ماڭىندا كۇردەلى اسكەري-ساياسي احۋال ساقتالىپ تۇرعانىن ەسكە سالادى.
«ورتالىق ازيانىڭ اينالاسىندا كۇردەلى اسكەري-ساياسي احۋال ساقتالىپ وتىرعان قازىرگى جاعدايدا قورعانىس ساياساتى مەن قاۋىپسىزدىك سالاسىندا بىرلەسە ارەكەت جاساۋ قاجەتتىگى تۋىندايدى. وڭىرلىك قاۋىپسىزدىك جۇيەسىن قۇرۋ، ونىڭ ىشىندە ورتالىق ازيانىڭ قاۋىپسىزدىگىنە بايلانىستى سىن-قاتەرلەر ءتىزىمىن جانە ونىڭ الدىن الۋ شارالارىن ازىرلەۋ ماسەلەسى وتە وزەكتى. ورتالىق ازيادا ءبىرتۇتاس قاۋىپسىزدىك كەڭىستىگىن قالىپتاستىرۋ، بۇرىننان بار جانە جاڭادان پايدا بولعان قاۋىپ-قاتەرلەرگە قارسى كۇرەسۋگە قاتىستى نەگىزگى تۇيتكىلدەردى شەشەتىن كەشەندى تاسىلدەر قاراستىرۋ، ولاردىڭ الدىن الۋ جانە قاتەرلەر تۋىنداسا قولعا الىناتىن شارالاردى ويلاستىرۋ، سونداي-اق ب ۇ ۇ- مەن جانە وسى سالاداعى باسقا دا حالىقارالىق، وڭىرلىك ۇيىمدارمەن بەلسەندى ىقپالداستىق ورناتۋ ايماقتاعى مەملەكەتتەردىڭ ەڭ باستى باسىمدىقتارى سانالادى»، - دەيدى مەملەكەت باسشىسى.
اۆتور
ەسىمجان ناقتىباي
