پرەزيدەنت توراعالىعىمەن عىلىم جانە تەحنولوگيالار جونىندەگى ۇلتتىق كەڭەستىڭ وتىرىسى ءوتىپ جاتىر
استانا. KAZINFORM - اقوردادا پرەزيدەنت قاسىم-جومارت توقايەۆتىڭ توراعالىعىمەن عىلىم جانە تەحنولوگيالار جونىندەگى ۇلتتىق كەڭەستىڭ وتىرىسى ءوتىپ جاتىر. جيىندا ءسوز سويلەگەن مەملەكەت باسشىسى بۇل كۇن قازىرگى قازاق عىلىمىنىڭ اتاسى قانىش ساتبايەۆىڭ ومىرگە كەلگەن كۇنى ەكەنىن اتاپ ءوتتى.
«الدىمەن، بارشاڭىزدى عىلىم كۇنىمەن شىن جۇرەكتەن قۇتتىقتايمىن! سىزدەر ارقىلى قازاقستان عالىمدارىنا جىلى لەبىزىمدى جەتكىزگىم كەلەدى. شىن مانىندە، بۇگىنگى مەرەكەلىك كۇن - قوعامىمىزداعى ەرەكشە ءسات، سەبەبى بۇل كۇن عۇلاما عالىم، زاڭعار تۇلعا قانىش ساتبايەۆتىڭ تۋعان كۇنىمەن تۇسپا-تۇس كەلىپ وتىر. ءدال بۇگىن اكادەميك قانىش ساتبايەۆتىڭ تۋعانىنا 125 جىل تولدى. ءبىز ۇلى ابايدى قازاق رۋحانياتىنىڭ تەمىرقازىعى، احمەت بايتۇرسىن ۇلىن ۇلت ۇستازى دەيمىز. ال قانىش ساتبايەۆتى قازىرگى قازاق عىلىمىنىڭ اتاسى دەۋگە بولادى.
وزدەرىڭىز بىلەسىزدەر، قانىش يمانتاي ۇلى ساتبايەۆ - حالقىمىزدىڭ ءبىرتۋار پەرزەنتى. ەلىمىز ءالى كۇنگە دەيىن ونىڭ عىلىمي جاڭالىقتارىنىڭ يگىلىگىن كورىپ وتىر. ايگىلى عالىمنىڭ مەرەيتويىن جوعارى دەڭگەيدە اتاپ ءوتۋ ماڭىزدى.
مەنىڭ تاپسىرماممەن كوپتەگەن ءىس-شارا وتكىزىلەدى. ءبىز، ءبىر جاعىنان، ۇلى عالىمعا شىنايى قۇرمەت كورسەتەمىز. ەكىنشى جاعىنان، ءبىلىم-عىلىم كۋلتىن قالىپتاستىرۋ جولىندا ماڭىزدى قادام جاسايمىز. ەڭ باستىسى، ەلىمىز ساتبايەۆ سالعان سارا جولدى جالعاستىرۋى قاجەت.
ءبىز «عىلىم» تۋرالى ءسوز قوزعاعاندا، ەڭ الدىمەن، ۇلى عالىم قانىش ساتبايەۆتىڭ ەسىمى ويعا ورالادى. بۇل - زاڭدىلىق. مەملەكەتتىك مارتەبەسىن قايتا يەلەنگەن ۇلتتىق عىلىم اكادەمياسى ەلىمىز عانا ەمەس، بۇكىل الەمنىڭ عىلىمي قاۋىمداستىعى ماقتان تۇتاتىن قانىش ساتبايەۆتىڭ ەسىمىمەن تىعىز بايلانىستى. بۇل كەزدەيسوقتىق ەمەس»، - دەدى مەملەكەت باسشىسى.
تارازداعى گيدرومەليوراتيۆتىك- قۇرىلىس ينستيتۋتى قايتا قالپىنا كەلتىرىلەدى.
«تارازداعى گيدرومەليوراتيۆتىك- قۇرىلىس ينستيتۋتىن قايتا قالپىنا كەلتىرۋ جونىندە شەشىم قابىلدادىق. وقۋ ورنىن ماتەريالدىق-تەحنيكالىق تۇرعىدان تولىق جابدىقتاۋ كەرەك. سەيسمولوگيا ينستيتۋتىنىڭ جاعدايى دا ءماز ەمەس. ۇكىمەتكە وسى ينستيتۋتتىڭ عىلىمي الەۋەتىن ارتتىرۋعا قاتىستى ناقتى ۇسىنىستار دايىنداۋدى تاپسىردىم. سونداي-اق سەيسمولوگيانى جانە سەيسميكالىق رەجيمدى باقىلاۋ قۇرالدارىن دامىتۋ بويىنشا پايدالى ۇسىنىستار ازىرلەنۋگە ءتيىس.
مەنىڭ تاپسىرماممەن الماتى اۋماعىنا ارنايى سەيسمولوگيالىق زەرتتەۋ جۇرگىزىلەدى. اكىمدىك ءۇش جىلدىق زەرتتەۋ جۇمىستارىنا قارجى بولەدى. ەنەرگەتيكالىق اپاتتى، ەپيدەميانى، قۋاڭشىلىقتى بولجاۋ جانە ونىڭ الدىن الۋ ماسەلەسى اسا ماڭىزدى. جاۋاپتى مينيسترلىكتەر ءتيىستى سالانى، ال اكىمدىكتەر ايماقتاردى دامىتۋ باعدارلامالارىن قايتا قاراۋى كەرەك. اسىرەسە، توتەنشە جاعداي تۋىنداۋ قاۋپى بار- جوعىن مۇقيات زەرتتەۋ قاجەت. بۇل جۇمىسقا عىلىمي قاۋىمداستىقتى جۇمىلدىرعان ءجون. ياعني گيدرولوگيا، كليماتولوگيا، گەوگرافيا، ينجەنەريا جانە وزگە دە سالا ماماندارىن تارتۋ قاجەت.
تاعى دا قايتالاپ ايتقىم كەلەدى، مەملەكەتتىك ورگاندار بارلىق ىستە، ەڭ الدىمەن، ساپالى عىلىمي قورىتىندىعا سۇيەنۋى كەرەك. بۇل - وتە ماڭىزدى مىندەت. شەشىمدەر ابدەن پىسىقتالىپ، ناقتى نەگىزدەلىپ بارىپ، قابىلدانۋعا ءتيىس. تالداۋ جۇرگىزىپ، احۋالدى بولجاۋ ءۇشىن عالىمداردىڭ قولىندا، زەرتتەۋ ورتالىقتارىندا قاجەتتى قۇرال- جابدىقتار بولۋعا ءتيىس».
اۆتور
ەربول جانات
