پرەزيدەنت ۆەتنام كوممۋنيستىك پارتياسى ورتالىق كوميتەتىنىڭ باس حاتشىسىن قارسى الدى
استانا. KAZINFORM - ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى تو لام ەلىمىزگە مەملەكەتتىك ساپارمەن كەلدى، دەپ حابارلايدى اقوردانىڭ باسپا ءسوز قىزمەتى.
پرەزيدەنت قاسىم-جومارت توقايەۆ ەلوردا اۋەجايىندا قازاقستانعا مەملەكەتتىك ساپارمەن كەلگەن ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى تو لامدى قارسى الدى.
قازاقستان مەن ۆەتنام باسشىلارى ەلوردا اۋەجايىندا از-كەم اڭگىمەلەستى.
قازاقستان پرەزيدەنتى قاسىم-جومارت توقايەۆ ەكى ەل ىنتىماقتاستىعىنىڭ الەۋەتى مول ەكەنىن اتاپ ءوتتى.
- قۇرمەتتى تو لام مىرزا، ەلىمىزدىڭ استاناسىنا قوش كەلدىڭىز! ءسىزدىڭ ساپارىڭىزدىڭ تاريحي ماڭىزى زور جانە قازاقستان مەن ۆەتنام اراسىنداعى ىقپالداستىقتى كەڭ اۋقىمدا دامىتۋعا تىڭ سەرپىن بەرەدى دەپ سانايمىن. ءسىزدىڭ ەلىڭىزگە جاساعان ساپاردان ۇلكەن اسەرمەن ورالدىم. ۆەتناممەن ءتۇرلى باعىتتاعى بايلانىستى جان-جاقتى نىعايتۋ تۇرعىسىنان جۇمىستى جالعاستىرۋ قاجەت دەگەن ويعا كەلدىم. ەكى ەل ىنتىماقتاستىعىنىڭ الەۋەتى مول، - دەدى توقايەۆ.
ءوز كەزەگىندە ۆەتنام كوممۋنيستىك پارتياسى وك باس حاتشىسى تو لام قازاقستان مەن ۆەتنامدى تامىرى تەرەڭ دوستىق قارىم-قاتىناس بايلانىستىراتىنىن ايتتى.
- قادىرلى پرەزيدەنت مىرزا، سىزگە جانە قازاقستان حالقىنا شىنايى ريزاشىلىعىمدى بىلدىرۋگە رۇقسات ەتىڭىز. ۇشاق تراپىنان قارسى العانىڭىز - ءبىز ءۇشىن زور مارتەبە. بۇل اسقان قوناقجايلىلىقتىڭ جانە بىزگە كورسەتىلگەن قۇرمەتتىڭ بەلگىسى. قازاقستان مەن ۆەتنامدى تامىرى تەرەڭ دوستىق قارىم-قاتىناس بايلانىستىرادى، - دەدى تو لام.
ساپار اياسىندا شاعىن جانە كەڭەيتىلگەن قۇرامدا كەلىسسوزدەر وتەدى. سونداي-اق ءبىرقاتار ماڭىزدى قۇجاتقا قول قويۋ جوسپارلانعان.
ەسكە سالساق، وسىعان دەيىن قاسىم-جومارت توقايەۆتىڭ شاقىرۋىمەن 5-7 -مامىر كۇندەرى قازاقستانعا ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى تو لام مەملەكەتتىك ساپارمەن كەلەتىنى بەلگىلى بولدى.
