پرەزيدەنت تەلەراديوكەشەنى وڭتۇستىك-شىعىس ازيادا مەديا سەرىكتەستىكتى كەڭەيتەدى

استانا. KAZINFORM - باس ديرەكتورى ۆۋ ۆەت ترانگ باستاعان ۆەتنام اقپارات اگەنتتىگىنىڭ (VNA) دەلەگاتسياسى ق ر پرەزيدەنتى تەلەراديوكەشەنىنىڭ كەڭسەسىندە بولىپ قايتتى.

كەزدەسۋ بارىسىندا تاراپتار ەكى ەلدىڭ بۇقارالىق اقپارات قۇرالدارى اراسىنداعى كاسىبي بايلانىستى دامىتۋ پەرسپەكتيۆالارىن تالقىلادى. بۇگىن قول قويىلعان اقپارات سالاسىنداعى ىنتىماقتاستىق تۋرالى كەلىسىم اياسىندا اقپاراتتىق ماتەريالدارمەن الماسۋ، كونتەنتتى بىرلەسىپ شىعارۋ، ەلدىك مەديا جوبالاردى جۇزەگە اسىرۋ جوسپارلانىپ وتىر. سونداي-اق تاجىريبە الماسۋ جانە بىرلەسكەن وقۋ باعدارلامالارىن وتكىزۋ مۇمكىندىكتەرى ءسوز بولدى.

ق ر پرەزيدەنتى تەلەراديوكەشەنى - ەلىمىزدەگى ءىرى مەديا كومپانيالاردىڭ ءبىرى. ونىڭ قۇرامىنا رەسپۋبليكالىق Jibek Joly تەلەارناسى مەن راديوسى، Silk Way حالىقارالىق تەلەارناسى، Kazinform حالىقارالىق اقپارات اگەنتتىگى جانە دەرەكتى كينو ورتالىعى كىرەدى.

ۆەتنام اقپارات اگەنتتىگى (VNA) - ۆەتنام سوتسياليستىك رەسپۋبليكاسىنىڭ رەسمي باسپا ءسوز ورگانى بولىپ سانالاتىن ۇلتتىق اقپارات اگەنتتىگى. 1945 -جىلعى 23 -تامىزدا قۇرىلعان، ەل ۇكىمەتىنە تىكەلەي باعىنادى. VNA ۆەتنام مەن الەمدەگى ساياسي، ەكونوميكالىق، الەۋمەتتىك، مادەني، عىلىمي جانە تەحنولوگيالىق تاقىرىپتاردا اقپارات تاراتادى.

ايتا كەتەيىك، بۇگىن استانادا قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىندا ستراتەگيالىق سەرىكتەستىك ورناتۋ تۋرالى بىرلەسكەن مالىمدەمە جاسالدى.

اۆتور

گۇلنۇر عازيز قىزى