پرەزيدەنت تاپسىرماسى: ب ج ز ق اقشاسى قانداي جوبالارعا تارتىلادى
استانا. KAZINFORM - ۇلتتىق بانك ءتوراعاسىنىڭ ورىنباسارى اقىلجان بايماعامبەتوۆ ءبىرىڭعاي جيناقتاۋشى زەينەتاقى قورىنىڭ اقشاسى قانداي جوبالارعا ينۆەستيتسيالاناتىنىن ايتتى.

- 2024-25 -جىلدارعا ب ج ز ق- دان 2 تريلليون تەڭگە دەيىن الۋ تۋرالى شەك قويىلعان. بۇل - ب ج ز ق- نىڭ ەكونوميكانى كرەديتتەۋدەگى ينۆەستيتسيالىق مۇمكىندىگى. اڭگىمە «بايتەرەك»، «سامۇرىق قازىنا» سياقتى كومپانيالاردىڭ، ەكىنشى دەڭگەيلى بانكتەردىڭ بورىش قۇرالدارى تۋرالى بولىپ وتىر. بۇل اقشالار ەكونوميكانىڭ سالالارىن ءارتاراپتاندىرۋ، يمپورتتى الماستىرۋ، قازاقستاندىق مازمۇندى ارتتىرۋ سياقتى شارالار تىكەلەي باعىتتالادى. اقشا (قارىز رەتىندە) نارىقتاعى مولشەرلەمەلەر بولىنەدى. ياعني، بۇل بولاشاق زەينەتكەرلەردىڭ ەسەبىنەن قانداي دا ءبىر جەڭىلدىكتەر بەرىلەدى دەگەن ءسوز ەمەس، - دەدى ول.
ايتۋىنشا، بۇل ۇزاق مەرزىمگە بەرىلەتىن بورىشتار بولماق.
- ءبىزدىڭ ەكونوميكامىزدا ونداي ۇزاق مەرزىمدى اقشانى ءدال وسى بجزق ءبولىپ، ينۆەستيتسيالاي الادى. قازىردىڭ وزىندە «بايتەرەكتىڭ» وبليگاتسيالارىن ينۆەستيتسيالاۋعا، كولىك سالاسىنداعى جوبالاردى ىسكە اسىرۋعا 173 ميلليارد تەڭگە، اگروونەركاسىپ كەشەنىنىڭ جوبالارىنا 213 ميلليارد تەڭگە ءبولىندى. بۇگىنگى تاڭدا ۇكىمەتتە ەنەرگەتيكا سالاسىنداعى ءتۇرلى جوبالار جوعارى دەڭگەيدە پىسىقتالىپ جاتىر. وبليگاتسيالاردى ساتىپ الۋ كوزىنىڭ ءبىرى ب ج ز ق بولۋى مۇمكىن. بانكتەردىڭ ينۆەستيتسيالىق جوبالارىن ىسكە اسىرۋ ءۇشىن دە وبليگاتسيالار ساتىپ الىنادى، - دەدى اقىلجان بايماعامبەتوۆ.
ەنەرگەتيكا ءمينيسترى الماسادام ساتقاليەۆ ۇلتتىق بانك وكىلى اتاعان جوبالاردىڭ ىشىندە ا ە س سالۋ جوق ەكەنىن ءمالىم ەتتى.
ايتا كەتۋ كەرەك، مەملەكەت باسشىسى قاسىم-جومارت توقايەۆ بۇگىن ۇكىمەتكە ب ج ز ق- دان «ۇزاق مەرزىمگە بەرىلەتىن» قارجىنى بەلسەندى تارتۋعا بولادى دەگەن نۇسقاۋ بەردى.
اۆتور
ەسىمجان ناقتىباي