پرەزيدەنت: تابىسىن ەلىمەن بولىسكەن ازاماتتار جوعارى قۇرمەتكە لايىق

«قازاقستاندا جاسالعان» دەگەن تاڭبا ەڭ مىقتى ساپانىڭ، ەڭ جاقسى ءونىمنىڭ بەلگىسىنە اينالۋعا ءتيىس.

بۇل تۋرالى «التىن ساپا» جانە «پارىز» سىيلىقتارىنىڭ يەگەرلەرىن ماراپاتتاۋ راسىمىندە پرەزيدەنت قاسىم-جومارت توقايەۆ ايتتى، دەپ حابارلايدى Kazinform.

«ەسكى سۇرلەۋگە ءتۇسىپ كەتپەي، پروگرەسس جولىنان اۋىتقىماۋىمىز قاجەت. بىزگە ۇزاق مەرزىمدى ماقساتتارىمىزدى ايقىنداپ الۋ كەرەك. ەرتەڭ كىم بولاتىنىمىز، مىڭ قۇبىلعان الەمدە قانداي ورىن الاتىنىمىز استە ەستەن شىقپاۋعا ءتيىس. ءبىر سوزبەن ايتقاندا، ءبىز تەك العا ۇمتىلۋىمىز كەرەك. ءبىز جاسامپاز ءارى جاڭاشىل بولۋعا ءتيىسپىز. ەلىمىزدىڭ العا قويعان ناقتى مەجەسى بار. مىزعىماس بىرلىك پەن قاجىرلى ەڭبەكتىڭ ارقاسىندا ءوز ماقساتىمىزعا جەتەمىز. ءبىز ۇيرەنەتىن عانا ەمەس، ۇيرەتەتىن ۇلت بولۋىمىز كەرەك. تۇتىناتىن ەمەس، وندىرەتىن مەملەكەت بولۋىمىز قاجەت. مەن بۇل تۋرالى ۇنەمى ايتىپ ءجۇرمىن. «قازاقستاندا جاسالعان» دەگەن تاڭبا ەڭ مىقتى ساپانىڭ، ەڭ جاقسى ءونىمنىڭ بەلگىسىنە اينالۋعا ءتيىس. «التىن ساپا» بايقاۋىنىڭ باستى ماقساتى - وسى»، - دەدى پرەزيدەنت.

سونىمەن بىرگە، مەملەكەت باسشىسى بيزنەس وكىلدەرى حالىق الدىنداعى جاۋاپكەرشىلىكتى تەرەڭ سەزىنۋى كەرەكتىگىن باسا ايتتى.

«ادال ازامات ءوز جاعدايىن عانا جاسامايدى. ول تۋعان اۋىلىنىڭ نەمەسە ءوزى جۇمىس ىستەپ جاتقان ايماقتىڭ قامىن دا ويلايدى. مۇنداي كاسىپكەرلەر كوپشىلىكتىڭ قولداۋىنا جانە العىسىنا يە بولادى. شىن مانىندە، تۋعان ەلدىڭ ىقىلاسىنان ارتىق ماراپات جوق. «پارىز» بايقاۋىنا قاتىسۋشىلار بيىل ءتۇرلى الەۋمەتتىك جوباعا بەلسەنە اتسالىستى. قايىرىمدىلىققا 80 ميلليارد تەڭگەگە جۋىق قارجى جۇمسادى. 6 مىڭنان استام جاڭا جۇمىس ورنىن اشتى. تابىسىن ەلىمەن بولىسكەن وسىنداي ازاماتتار جوعارى قۇرمەتكە لايىق»، - دەگەن قاسىم-جومارت توقايەۆ «التىن ساپا» جانە «پارىز» بايقاۋىنا قاتىسقان كاسىپكەرلەرگە ريزاشىلىعىن ءبىلدىردى.
اۆتور
مارلان جيەمباي