پرەزيدەنت سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆتى قابىلدادى

مەملەكەت باسشىسى سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆتى قابىلدادى، دەپ حابارلايدى Kazinform اقورداعا سىلتەمە جاساپ.

پرەزيدەنتكە سولتۇستىك قازاقستان وبلىسىنىڭ الەۋمەتتىك-ەكونوميكالىق دامۋى تۋرالى ەسەپ بەرىلدى.

قاسىم-جومارت توقايەۆقا ءوڭىر شارۋالارى قيىندىقتارعا قاراماستان 3,7 ميلليون توننا استىق جيناعانى جونىندە باياندالدى.

مەملەكەت باسشىسىنا وبلىستا 13 ءسۇت فەرماسىنىڭ قۇرىلىسى ءجۇرىپ جاتقانى، ونىڭ التاۋى جىل سوڭىنا دەيىن ىسكە قوسىلاتىنى جايىندا مالىمەت بەرىلدى. اگرارلىق سەكتوردا سوماسى 80 ميلليارد تەڭگە بولاتىن 27 جوبانى ىسكە اسىرۋ جوسپارلانعان.

سونىڭ ناتيجەسىندە 1000 جاڭا جۇمىس ورنى اشىلماق. بۇل ءوڭىر حالقىنىڭ قۇس ەتىنە، ءسۇت ونىمدەرىنە، كوكونىستەرگە دەگەن قاجەتتىلىگىن قامتاماسىز ەتۋگە مۇمكىندىك بەرەدى.

ال ونەركاسىپ سالاسىندا قۇنى 469 ميلليارد تەڭگە بولاتىن 39 ينۆەستيتسيالىق جوبا جۇزەگە اسىرىلىپ جاتىر.

بۇل 6 مىڭ جۇمىس ورنىن اشۋعا مۇمكىندىك بەرەدى. بيىل 15 جوبا ىسكە قوسىلادى.

عاۋەز نۇرمۇحامبەتوۆتىڭ ايتۋىنشا، جاڭا نىساندار سالۋ ارقىلى 25 اۋىل سۋمەن قامتاماسىز ەتىلەدى. سونداي- اق كەشەندى بلوك-مودۋلدەر ورناتۋ ارقىلى 149 اۋىلعا جانە توپتىق قۇبىر جوبالارى ەسەبىنەن 46 اۋىلعا سۋ بەرىلەدى.

سونىمەن قاتار پرەزيدەنتكە «جايلى مەكتەپ» ۇلتتىق جوباسى اياسىندا پەتروپاۆل قالاسىندا 4 مەكتەپ سالىناتىنى جونىندە ايتىلدى.

قازىرگى ۋاقىتتا مۇمكىندىگى شەكتەۋلى بالالارعا ارنالعان مەكتەپ قۇرىلىسى جۇرگىزىلىپ جاتىر.

«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وڭىردە 46 مەديتسينالىق مەكەمە ىسكە قوسىلادى.

ونىڭ سەگىزى جىل سوڭىنا دەيىن پايدالانۋعا بەرىلەدى. سونداي- اق وبلىس ورتالىعىندا ەكى ەمحانا سالىنعان. ءۋاليحانوۆ اۋدانىندا ەمحانا قۇرىلىسى جۇرگىزىلىپ جاتىر.

بۇدان بولەك، وبلىس اكىمى وڭىردەگى جىلىتۋ ماۋسىمى قالىپتى رەجيمدە ءوتىپ جاتقانىن جەتكىزدى.

كەزدەسۋ سوڭىندا قاسىم- جومارت توقايەۆ وبلىستى ودان ءارى دامىتۋ جانە حالىقتىڭ وزەكتى ماسەلەلەرىن شەشۋ جونىندە ءبىرقاتار تاپسىرما بەردى.
اۆتور
جانات قاپالبايەۆا