پرەزيدەنت «سامۇرىق- قازىنا» اكسيونەرلىك قوعامىنىڭ باسقارما ءتوراعاسى نۇرلان جاقىپوۆتى قابىلدادى

استانا. KAZINFORM - مەملەكەت باسشىسى «سامۇرىق- قازىنا» اكسيونەرلىك قوعامىنىڭ باسقارما ءتوراعاسى نۇرلان جاقىپوۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

نۇرلان جاقىپوۆ قوردىڭ بيىلعى ءبىرىنشى جارتىجىلدىقتاعى قىزمەتىنىڭ نەگىزگى قورىتىندىلارى جانە الداعى جۇمىستارىنىڭ جوسپارىن تانىستىردى. ونىڭ ايتۋىنشا، باستى وندىرىستىك كورسەتكىشتەر جوسپارعا سايكەس اتقارىلىپ وتىر. قوردىڭ كىرىسى 7,9 تريلليون تەڭگە بولدى. بۇل بەلگىلەنگەن جوسپاردان 7 پايىزعا ارتىق.

قور تىكەلەي شەتەلدىك ينۆەستيتسيانىڭ كاتاليزاتورىنا اينالدى.

سونىمەن قاتار مۇناي-گاز حيمياسى، ەنەرگەتيكا، كولىك جانە لوگيستيكا، ماشينا جاساۋ، سيفرلاندىرۋ سالالارىنداعى جوبالارعا شەتەلدىك سەرىكتەستەرىمەن بىرلەسىپ ينۆەستيتسيا قۇيادى. «سامۇرىق-قازىنا» توبىنىڭ ينۆەستيتسيالىق پورتفەلىندە جالپى سوماسى 53,5 تريلليون تەڭگە بولاتىن 130-دان استام جوبا بار ەكەنىن باياندادى. مۇناي-گاز، مۇناي حيمياسى، ەنەرگەتيكا، لوگيستيكا سالالارىندا جانە تاۋ-كەن ونەركاسىبىندە جۇزەگە اسىرىلاتىن جوبالار ەل ەكونوميكاسىنا مۋلتيپليكاتيۆتى اسەر ەتەدى دەپ جوسپارلانعان.

قوردىڭ بيزنەستىڭ الەۋمەتتىك جاۋاپكەرشىلىگى اياسىنداعى قايىرىمدىلىق جوبالارى تۋرالى مالىمەت بەردى. جىل سوڭىنا دەيىن ەلىمىزدە 40 وڭالتۋ ورتالىعىن اشۋ جوسپارلانىپ وتىر.

مەملەكەت باسشىسى ينۆەستيتسيالىق جانە الەۋمەتتىك جوبالاردى جۇزەگە اسىرۋ، سونداي-اق قور جۇمىسىن ودان ءارى جەتىلدىرۋ جونىندە ناقتى تاپسىرما بەردى.

اۆتور

ەلميرا ورالبايەۆا