پرەزيدەنت قازاقستاندىقتاردى جەڭىس كۇنىمەن قۇتتىقتادى
استانا. KAZINFORM - مەملەكەت باسشىسى قاسىم-جومارت توقايەۆ قازاقستان حالقىن جەڭىس كۇنىمەن قۇتتىقتادى. بۇل تۋرالى اقوردا ءمالىم ەتتى.
قۇرمەتتى وتانداستار!
سىزدەردى ۇلى جەڭىستىڭ 80 جىلدىعىمەن شىن جۇرەكتەن قۇتتىقتايمىن!
وسى مەرەيلى كۇندى ەلىمىزدىڭ ءاربىر ازاماتى ەرەكشە كوڭىل-كۇيمەن قارسى الىپ، جەڭىمپاز اعا بۋىنعا شەكسىز ريزاشىلىعىن بىلدىرەدى.
فاشيزمگە قارسى سۇراپىل سوعىس حالقىمىزعا وراسان زور قايعى- قاسىرەت اكەلدى. ءبىزدىڭ قاھارمان جاۋىنگەرلەرىمىز اسقان ەرلىك پەن باتىلدىق تانىتىپ، ازاتتىق پەن ادىلدىك جولىندا ايانباي كۇرەستى. ءجۇز مىڭداعان ساربازىمىز ۇرىس دالاسىندا قازا تاپتى. تىلداعى جۇرت تا ادام ايتقىسىز قيىندىققا قاراماستان تىنىمسىز تەر توگىپ، جەڭىستى جاقىنداتۋعا ولشەۋسىز ۇلەس قوستى. ولار ەگىس القابىندا، زاۋىتتار مەن فابريكالاردا كۇن-ءتۇن دەمەي جۇمىس ىستەپ، مايداندى قامتاماسىز ەتتى.
ءبىز وتانداستارىمىزدىڭ قايتپاس قايسارلىعى مەن قاجىرلى ەڭبەگىن ەشقاشان ۇمىتپايمىز. جانقيارلىق پەن ەرلىكتىڭ وزىق ۇلگىسىن كورسەتكەن باتىرلارىمىزدىڭ ەسىمىن ءاردايىم ۇلىقتايمىز. ارداگەرلەرىمىزگە قامقورلىق جاساپ، قولداۋ بىلدىرەمىز.
قازاقستاندا جەڭىس كۇنىنە وراي كوپتەگەن ءىس-شارا وتكىزىلىپ جاتىر. ەلىمىز بويىنشا بەس جۇزگە جۋىق كوشەنى قاھارمان ەرلەرىمىزدىڭ اتىمەن اتاۋ تۋرالى شەشىم قابىلداندى. اۋقىمدى اسكەري شەرۋ ءوتتى. مۇنىڭ ءبارى زۇلمات سوعىستىڭ زاردابىن حالقىمىز ەشقاشان جادىنان شىعارماۋى ءۇشىن قاجەت.
ءبىز جەڭىس كۇنىندە بەيبىت ءومىردىڭ قادىرىن ۇعىنىپ، دوستىق پەن تىنىشتىقتىڭ ماڭىزدىلىعىن تەرەڭ تۇسىنەمىز. وسى مىزعىماس قۇندىلىقتار ءاردايىم حالقىمىزدىڭ ءال-اۋقاتىن ارتتىرۋدىڭ جانە قازاقستاندى تۇراقتى دامىتۋدىڭ بەرىك نەگىزى بولىپ قالا بەرەدى. مەن بۇعان كامىل سەنەمىن.
قادىرلى ارداگەرلەرىمىزگە جانە بارشا وتانداستارىمىزعا زور دەنساۋلىق، باق-بەرەكە تىلەيمىن!
ۇلى جەڭىس كۇنى قۇتتى بولسىن!
