پرەزيدەنت «قازاقستان تەمىر جولى» ۇ ك» ا ق باسقارما ءتوراعاسى نۇرلان ساۋرانبايەۆتى قابىلدادى

استانا. KAZINFORM - قاسىم-جومارت توقايەۆقا ۇلتتىق كومپانيا قىزمەتىنىڭ 2023-جىلعى نەگىزگى ناتيجەسى جانە الداعى كەزەڭگە ارنالعان جوسپارى تۋرالى ەسەپ بەرىلدى.

نۇرلان ساۋرانبايەۆتىڭ ايتۋىنشا، سوڭعى ءۇش جىلدا «قازاقستان تەمىر جولىنىڭ» نەگىزگى وندىرىستىك كورسەتكىشتەرىندە ءوسىم بايقالادى. بىلتىر جۇك اينالىمى 7 پايىزعا ارتىپ، 270 ميلليارد توننا-كيلومەترگە جەتتى. ترانزيتتىك تاسىمالداۋ كولەمى 18 پايىزعا ۇلعايىپ، 27 ميلليون توننادان استى. ناتيجەسىندە كومپانيانىڭ كىرىسى وتكەن جىلمەن سالىستىرعاندا 29,3 پايىزعا ءوسىپ، 1,9 تريلليون تەڭگەنى قۇرادى. كومپانيا 154 ميلليارد تەڭگە تازا پايدا تاپتى. بۇل 2022 -جىلمەن سالىستىرعاندا ءتورت ەسە كوپ ءارى كومپانيانىڭ رەكوردتىق كورسەتكىشى سانالادى.

پرەزيدەنتكە دوستىق -مويىنتى، الماتى ستانسياسىن اينالىپ وتەتىن تەمىرجول جەلىسىن سالۋ جانە باسقا دا ءىرى ينفراقۇرىلىمدىق جوبالاردىڭ ىسكە اسىرىلۋى تۋرالى باياندالدى. بۇگىنگى تاڭدا 350 شاقىرىمنان استام جول توسەلگەن. اتالعان جوبالاردىڭ ىسكە قوسىلۋى مەملەكەتارالىق ءتۇيىسۋ پۋنكتتەرىنىڭ وتكىزۋ قابىلەتىن ارتتىرادى.

سونىمەن قاتار مەملەكەت باسشىسىنا شيان قالاسىنداعى قۇرعاق پورتتا جۇك تەرمينالىنىڭ قۇرىلىسى اياقتالعانى جونىندە مالىمەت بەرىلدى. قىتايدىڭ ەڭ ءىرى لوگيستيكالىق حابىندا ورنالاسقان بۇل تەرمينال ەلىمىزگە قاراي جۇكتەردىڭ تۇراقتى تاسىمالدانۋىن قامتاماسىز ەتەدى جانە وتاندىق ەكسپورتتاۋشىلار ءۇشىن جاڭا وتكىزۋ نارىقتارىنا جول اشادى.

الەمدىك Huawei, Wabtec جانە PSA سەكىلدى جەتەكشى كومپانيالارمەن بىرگە «اقىلدى تەمىرجول» جوباسىن جۇزەگە اسىرۋ جۇمىستارى جۇرگىزىلىپ جاتىر. جاڭا شەشىمدەردىڭ ەنگىزىلۋى تەمىرجولدىڭ وتكىزۋ قابىلەتىن ۇلعايتۋعا، وتىن شىعىنىن ازايتۋعا جانە پويىزداردىڭ قاۋىپسىزدىگىن ارتتىرۋعا مۇمكىندىك بەرەدى.

كەزدەسۋ سوڭىندا قاسىم-جومارت توقايەۆ كومپانيانىڭ ينۆەستيتسيالىق جوبالارىن ىسكە اسىرۋ ماڭىزدى ەكەنىن اتاپ ءوتىپ، ەلىمىزدىڭ كولىك-ترانزيت الەۋەتىن دامىتۋ ماسەلەسىنە باسا نازار اۋداردى.

اۆتور

ابىلايحان جۇماشيەۆ