پرەزيدەنت - قازاقستان قازاق ءتىلىنىڭ مارتەبەسىن كۇشەيتۋ ساياساتىن جالعاستىرا بەرەدى

CIS Summit in Bishkek
Фото: Photo: Akorda

قاسىم- جومارت توقايەۆ ت م د- عا مۇشە ەلدەر اراسىنداعى كوپجاقتى ىقپالداستىقتا ورىس ءتىلى ەرەكشە ءرول اتقاراتىنىن اتاپ ءوتتى، دەپ حابارلايدى Kazinform اقورداعا سىلتەمە جاساپ.

«بيىل ت م د- دا «ورىس ءتىلى جىلى» دەپ جاريالانۋىنىڭ سيمۆولدىق ءمانى بار. سونىمەن قاتار ءبىز بۇگىن ورىس تىلىنە قاتىستى حالىقارالىق ۇيىم قۇرۋ تۋرالى شارت پەن جارعىعا قول قويۋ جونىندە تاريحي شەشىم قابىلدايمىز. بۇل ۇيىم دەربەس حالىقارالىق قۇرىلىمعا اينالادى، قۇقىق سۋبەكتىسى رەتىندە تانىلادى. جاڭا ۇيىم بارلىق ەل ءۇشىن اشىق بولادى. ارينە، بۇل - جاھاندىق گۋمانيتارلىق ىنتىماقتاستىق تۇرعىسىنان وتە وزەكتى. ت م د كەڭىستىگىندە جانە ودان الدەقايدا كەڭىرەك حالىقارالىق اۋقىمدا ورىس ءتىلىن ناسيحاتتاۋ ءۇشىن قابىلدانىپ جاتقان شارالار ەلدەرىمىزدىڭ ۇلتتىق بىرەگەيلىگىن نىعايتۋ ۇردىسىنە كەرى اسەر ەتپەيدى. قازاقستان قازاق ءتىلىنىڭ مەملەكەتتىك ءتىل مارتەبەسىن كۇشەيتۋ ساياساتىن جالعاستىرا بەرەدى»، - دەدى مەملەكەت باسشىسى ت م د- عا مۇشە مەملەكەتتەر باسشىلارى كەڭەسىنىڭ وتىرىسىندا.

پرەزيدەنت دوستاستىق ەلدەرىنىڭ ۆولونتەرلەر بىرلەستىكتەرىنىڭ كۇش- جىگەرىن جۇمىلدىرۋ ماڭىزدى ەكەنىنە نازار اۋداردى.

«2024 -جىلدى ت م د- دا ۆولونتەرلىك قوزعالىس جىلى دەپ جاريالاۋ باستاماسىن قۇپتايمىز. قازاقستان 2020 -جىلدى ۆولونتەر جىلى رەتىندە اتاپ ءوتتى. ەرىكتىلەردىڭ ىزگى امالدارى قوعامىمىزدا تىلەۋلەستىك، مەيىرىمدىلىك جانە جاناشىرلىق قاسيەتتەرىنىڭ تەرەڭ تامىر جايۋىنا ەلەۋلى ۇلەس قوسادى. مۇنداي ادامگەرشىلىك تالپىنىستارعا جان- جاقتى قولداۋ كورسەتۋ ماڭىزدى»، - دەدى قاسىم- جومارت توقايەۆ.

پرەزيدەنت دوستاستىق ەلدەرى ەرىكتىلەرىنىڭ جىل سايىنعى فورۋمىن وتكىزۋدى جانە وعان ت م د- نىڭ تۇراقتى الاڭى مارتەبەسىن بەرۋدى ۇسىندى.

مەملەكەت باسشىسى ءسوزىنىڭ سوڭىندا 2024 -جىلى رەسەي فەدەراتسياسىنىڭ ت م د- عا ءتوراعالىق ەتۋى جانە كەزەكتى سامميتتى كەلەسى جىلى كۇزدە ماسكەۋدە وتكىزۋ تۋرالى شەشىمدى قولدادى. سونداي- اق وزبەكستان پرەزيدەنتى شاۆكات ميرزيەۆتى ت م د- نىڭ قۇرمەت بەلگىسىمەن ماراپاتتاۋ تۋرالى قىرعىزستاننىڭ باستاماسىن قۇپتادى.

كەڭەستە سونداي- اق، قىرعىزستان پرەزيدەنتى سادىر جاپاروۆ، ازەربايجان پرەزيدەنتى يلحام اليەۆ، بەلارۋس پرەزيدەنتى الەكساندر لۋكاشەنكو، رەسەي پرەزيدەنتى ۆلاديمير پۋتين، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ، وزبەكستان پرەزيدەنتى شاۆكات ميرزيەۆ، ت م د باس حاتشىسى سەرگەي لەبەديەۆ ءسوز سويلەدى.

قاسىم- جومارت توقايەۆ، كەشە، 12 -قازان كۇنى اقوردادا «قازاق ءتىلى» قوعامىنىڭ پرەزيدەنتى، ۇلتتىق قۇرىلتايدىڭ مۇشەسى راۋان كەنجەحان ۇلىن قابىلداپ، قازاق ءتىلىن دامىتۋعا باعىتتالعان ءبىرقاتار تاپسىرما بەرگەن بولاتىن.

ەسكە سالايىق، قازاقستان پرەزيدەنتى قاسىم- جومارت توقايەۆ بۇگىن قىرعىزستانعا جۇمىس ساپارىمەن باردى.

اۆتور

ەلميرا ورالبايەۆا

سوڭعى جاڭالىقتار