پرەزيدەنت ماڭعىستاۋ وڭىرىندەگى كولىك-لوگيستيكا ينفراقۇرىلىمىنىڭ دامۋ بارىسىمەن تانىستى
استانا. KAZINFORM - قاسىم-جومارت توقايەۆ قازاقستاننىڭ ترانزيتتىك الەۋەتىن دامىتۋدا ماڭىزدى رولگە يە باستى لوگيستيكالىق حابتىڭ ءبىرى - اقتاۋ حالىقارالىق تەڭىز پورتىنا باردى. بۇل تۋرالى اقوردانىڭ باسپا ءسوز قىزمەتى حابارلادى.
بۇگىندە اتالعان نىسانداعى كوپ ماقساتتى زاماناۋي تەرمينال شىعىس-باتىس، سولتۇستىك-وڭتۇستىك باعىتتارى بويىنشا تاۋلىك بويى جۇك تيەۋ مەن ءتۇسىرۋ قىزمەتىن ۇسىنادى. پورتتىڭ حالىقارالىق كولىك دالىزدەرىنىڭ توعىسىندا ورنالاسۋى ۇلتتىق جانە وڭىرلىك لوگيستيكانى نىعايتۋدا ايرىقشا ستراتەگيالىق ءمانىن كورسەتەدى.
پرەزيدەنتكە ماڭعىستاۋ وبلىسىنىڭ كولىك-لوگيستيكا ينفراقۇرىلىمىن دامىتۋ پەرسپەكتيۆاسى، سونىڭ ىشىندە ەلىمىزدىڭ ترانزيتتىك الەۋەتىن كەڭەيتۋ جانە پورت قۋاتىن جاڭعىرتۋ جوسپارلارى جونىندە باياندالدى.
كولىك ءمينيسترى مارات قارابايەۆ وڭىردە جالپى قۇنى 1,9 تريلليون تەڭگە بولاتىن 24 ينفراقۇرىلىمدىق جوبانىڭ جۇزەگە اسىرىلىپ جاتقانىن ايتتى. بىلتىر ترانسكاسپي حالىقارالىق كولىك ءدالىزى بويىنشا جۇك تاسىمالى 62 پايىزعا ءوسىپ، 4,5 ميلليون تونناعا جەتكەن. اتالعان باعىتپەن 358 كونتەينەرلىك پويىز، 27 مىڭ اۆتوكولىك جۇك تاسىمالداعان. ەكسپورت كولەمى 3,2 ميلليون توننانى قۇراعان. 2028 -جىلعا دەيىن بۇل كورسەتكىشتى 10 ميلليون تونناعا دەيىن جەتكىزۋ جوسپارلانىپ وتىر.
اقتاۋدا كونتەينەرلىك حاب سالىنىپ جاتىر. بۇل جوبا پورتتىڭ جۇك وتكىزۋ قابىلەتىن 140 مىڭنان 240 مىڭ ج ف ە- گە دەيىن ۇلعايتادى.
مەملەكەت باسشىسىنىڭ تاپسىرماسىنا سايكەس، كەندىرلى كۋرورتى ايماعىندا جاڭا اۋەجايدىڭ قۇرىلىسى باستالدى. اۋەجاي ساعاتىنا 150 جولاۋشىنى قابىلداي الادى. كەندىرلىنى الماتى جانە استانا قالالارىمەن جالعايتىن تۇراقتى اۋە رەيستەرىن اشۋ جوسپارلانعان.
بۇدان بولەك، ورتالىق-باتىس جانە بەينەۋ-سەكسەۋىل سەكىلدى اۋقىمدى جول قۇرىلىسى جوبالارىن جۇزەگە اسىرۋ كوزدەلگەن. سونىڭ ناتيجەسىندە باستى باعىتتارداعى لوگيستيكانى وڭتايلاندىرىپ، ترانزيت جانە ەكسپورت جۇكتەرىن تاسىمالداۋ شىعىندارىن ەداۋىر ازايتۋعا مۇمكىندىك تۋادى. اتاپ ايتقاندا، استانادان اقتاۋعا دەيىنگى جول 800 شاقىرىمعا، ال قورعاستان اقتاۋعا دەيىنگى اراقاشىقتىق 900 شاقىرىمعا قىسقارادى.
مەملەكەت باسشىسى كەندىرلى كۋرورتى اۋماعىنداعى اۋەجاي قۇرىلىسىن تەزىرەك اياقتاۋدى تاپسىردى. پرەزيدەنتتىڭ ايتۋىنشا، قازاقستاندى ەۋرازيانىڭ كولىك-لوگيستيكا حابىنا اينالدىرۋ جولىندا ماڭعىستاۋدىڭ الاتىن ورنى ەرەكشە. سوندىقتان ونىڭ الەۋەتىن ءتيىمدى پايدالانۋ قاجەت. ويتكەنى بۇل مىندەتتىڭ ستراتەگيالىق ماڭىزى زور.
