پرەزيدەنت ۇلتتىق قاۋىپسىزدىك ورگاندارى قىزمەتىنىڭ باعىتى بويىنشا ءبىرقاتار تاپسىرما بەردى
استانا. KAZINFORM - مەملەكەت باسشىسى ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆتى قابىلدادى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
ەرمەك ساعىمبايەۆ ۆەدومستۆونىڭ جىل باسىنان بەرى اتقارعان جۇمىسىنىڭ نەگىزگى قورىتىندىلارى جانە الداعى كەزەڭگە ارنالعان مىندەتتەرى تۋرالى ەسەپ بەردى.
ۇ ق ك ءتوراعاسىنىڭ بايانداماسىنان:
- ۇلتتىق قاۋىپسىزدىك ورگاندارى 4 تەرروريستىك اكتىنىڭ الدىن العان. تەرروريزم مەن ەكسترەميزمگە قاتىسى بار 84 ادام سوتتالعان، 44 ادام ۇستالعان؛
- لاڭكەستىك سيپاتتاعى قىلمىس جاسادى دەگەن كۇدىكپەن ىزدەۋدە جۇرگەن قازاقستاندىق 6 ازامات سيريا مەن تۇركيادان ەكستراديتسيالانىپ، ولاردىڭ ەكەۋى سوتتالعان؛
- تەرروريزم مەن ەكسترەميزمگە قاتىسى بار 824 شەتەلدىكتىڭ قازاقستانعا كىرۋىنە جول بەرىلمەگەن؛
- ىشكى ىستەر مينيسترلىگىمەن بىرگە 19 ۇيىمداسقان قىلمىستىق توپتىڭ اشكەرەلەنگەن، 60 ادام قاماۋعا الىنعان؛
- زاڭسىز اينالىمداعى 505 اتىس قارۋى، 5 قولدان جاسالعان جارىلعىش قۇرىلعى، 45 جارىلعىش توپتاما جانە 15046 وق-ءدارى تاركىلەنگەن؛
- ەسىرتكى وندىرەتىن 33 زەرتحانا، ونى تاسىمالدايتىن 35 حالىقارالىق جانە 31 وڭىرلىك ارنا جويىلعان؛
- 3,2 توننا ەسىرتكى قۇرالدارى جانە پسيحوتروپتىق زاتتار، 4,5 توننا كوكنار شيكىزاتى، 18,8 توننا پرەكۋرسورلار تاركىلەنگەن؛
- ەسىرتكى قۇرالدارى مەن پسيحوتروپتىق زاتتاردىڭ زاڭسىز اينالىمىنا قاتىسى بار 162 ادام سوتتالعان؛
- ەكونوميكالىق قاۋىپسىزدىكتى قامتاماسىز ەتۋ جانە سىبايلاس جەمقورلىققا قارسى ءىس-قيمىل اياسىندا 1,6 تريلليون تەڭگەدەن استام كولەمدە مەملەكەتكە كەلتىرىلەتىن زالالعا توسقاۋىل قويىلىپ، بيۋدجەتكە 315 ميلليارد تەڭگە وتەلگەن. سىبايلاس جەمقورلىق ارەكەت جاساعانى ءۇشىن 46 ادام سوتتالعان؛
- مەملەكەتتىك شەكارادا 55 مىڭعا جۋىق قۇقىق بۇزۋشى ۇستالدى، قارۋ مەن وق-ءدارىنى، ەسىرتكى مەن باسقا دا تىيىم سالىنعان زاتتاردى تاسىمالداۋدىڭ 1300-دەن اسا ارەكەتىنىڭ جولى كەسىلگەن؛
- شەكارا ارقىلى 18 ميلليارد تەڭگە كولەمىندە ۆاليۋتا مەن قۇنى 66 ميلليارد تەڭگە بولاتىن تاۋارلاردى زاڭسىز وتكىزۋگە جول بەرىلمەگەن. زاڭسىز كوشى-قوننىڭ 20 ارناسى توقتاتىلعان؛
- مەملەكەتتىك ورگانداردىڭ اقپاراتتىق جۇيەلەرىنە 552 ميلليوننان استام كيبەرشابۋىلدى جانە 6 مىڭ DDoS- شابۋىلدى تويتارعان.
پرەزيدەنت كەزدەسۋ سوڭىندا ۇلتتىق قاۋىپسىزدىك ورگاندارى قىزمەتىنىڭ باعىتتارى بويىنشا ءبىرقاتار تاپسىرما بەردى.
