پرەزيدەنت ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆتى قابىلدادى
استانا. KAZINFORM - اقىلبەك كۇرىشبايەۆ ۇلتتىق عىلىم اكادەمياسىنىڭ بىلتىرعى اتقارعان قىزمەتىنىڭ نەگىزگى ناتيجەلەرى جونىندە باياندادى. بۇل تۋرالى اقوردانىڭ باسپا ءسوز قىزمەتى حابارلادى.

اقىلبەك كۇرىشبايەۆ 2024 -جىلى وتاندىق عىلىمنىڭ جاعدايىن باعامداپ، سالانى دامىتۋدىڭ باسىم باعىتتارىن ايقىنداۋ ماقساتىندا جۇرگىزىلگەن كەشەندى جۇمىس جونىندە مالىمەت بەردى.
ايتۋىنشا، بىلتىر باعدارلامالىق- نىسانالى قارجىلاندىرۋ كوزدەلگەن 113 عىلىمي-تەحنيكالىق تاپسىرماعا ساراپتاما جۇرگىزىلگەن، سونداي-اق 3 ينتەگراتسيالانعان ءپانارالىق عىلىمي-تەحنيكالىق باعدارلاما ازىرلەنگەن.
قاسىم-جومارت توقايەۆ وتاندىق عىلىمنىڭ الەۋەتىن ارتتىرۋ ءۇشىن ودان ءارى جۇيەلى شارالار قابىلداۋ قاجەت ەكەنىنە نازار اۋداردى.
تاياۋدا ۇلتتىق عىلىم اكادەمياسىنا پرەزيدەنت جانىنداعى جوعارى عىلىمي ۇيىم مارتەبەسىن بەرەتىن جارلىققا قول قويىلدى. ۇكىمەتكە اتالعان جارلىقتى جۇزەگە اسىرۋعا قاتىستى قۇقىقتىق ماسەلەلەردى جەدەلدەتۋ تۋرالى تاپسىرما بەرىلدى.
سونداي- اق عىلىمدى قارجىلاندىرۋ 3,5 ەسە ۇلعايدى، «عىلىم جانە تەحنولوگيالىق ساياسات تۋرالى» جاڭا زاڭ قابىلداندى. جاس عالىمداردى الەۋمەتتىك تۇرعىدان قولداۋ كۇشەيتىلدى. پرەزيدەنتتىڭ تاپسىرماسىمەن ولارعا باسپانا بەرىلىپ جاتىر.
مەملەكەت باسشىسى ۇلتتىق عىلىم اكادەمياسىنا ءبىرقاتار مىندەت جۇكتەدى.
عىلىمدى كوممەرتسيالاندىرۋ سالاسىندا بيىل ەلىمىزدە قانداي جەتىستىكتەر بولعانىن جازعان ەدىك.
اۆتور
ەلميرا ورالبايەۆا