پرەزيدەنت «كەلەشەك» جيناقتاۋ جۇيەسى تۋرالى زاڭعا قول قويدى
استانا. KAZINFORM - مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك ءبىلىم بەرۋ جيناقتاۋ جۇيەسى، اقپارات، قوعامدىق دامۋ، مادەنيەت جانە ارحيۆ ءىسى سالالارىندا ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.
بۇل تۋرالى اقوردانىڭ باسپا ءسوز قىزمەتى حابارلادى.
تۇزەتۋلەردىڭ ءبىرىنشى بلوگى مەملەكەتتەن باستاپقى ءبىلىم بەرۋ كاپيتالى، جىل سايىن تولەنەتىن مەملەكەتتىك سىيلىق اقى جانە ينۆەستيتسيالىق تابىس قاراستىرىلعان، سونداي-اق بەس جاستان اسقان بالالاردى قامتيتىن «كەلەشەك» ءبىرىڭعاي ەرىكتى جيناقتاۋ جۇيەسىن ەنگىزۋ ماقساتىندا ازىرلەنگەن.
ءبىرجولعى باستاپقى ءبىلىم بەرۋ كاپيتالى 2025 -جىلى جانە ودان كەيىنگى جىلدارى 5 جاسقا تولاتىن بالالارعا تولەنەدى. ونىڭ مولشەرى عىلىم جانە جوعارى ءبىلىم مينيسترلىگى بەكىتەتىن باستاپقى ءبىلىم بەرۋ كاپيتالىن ەسەپتەۋ، پايدالانۋ جانە قايتارۋ قاعيدالارىنا ساي ەسەپتەلەدى.
«كەلەشەك» جۇيەسى جىل سايىن %5 مەملەكەتتىك سىيلىق اقى، ال حالىقتىڭ الەۋمەتتىك وسال توپتارىنىڭ بالالارى ءۇشىن %7 مەملەكەتتىك سىيلىق اقى كوزدەلگەن قولدانىستاعى مەملەكەتتىك ءبىلىم بەرۋ جيناقتاۋ جۇيەسىمەن بىرگە بالاڭىزدىڭ بولاشاعى ءۇشىن قاراجات جيناۋعا مۇمكىندىك بەرەدى. ياعني قارجىنى تەحنيكالىق جانە كاسىپتىك ءبىلىم الۋعا، ورتا مەكتەپ بىتىرگەننەن كەيىن جوعارى ءبىلىم الۋعا جانە جوعارى وقۋ ورنىنان كەيىن ءبىلىمىن جەتىلدىرۋگە، سونداي-اق تۇرعىن ءۇي جاعدايىن جاقسارتۋعا جۇمساۋعا بولادى.
تۇزەتۋلەردىڭ ەكىنشى بلوگى كرەاتيۆتى يندۋستريانى قولداۋ، سونىڭ ىشىندە ءار وبلىس ورتالىعىندا جانە ءىرى قالالاردا كرەاتيۆتى يندۋستريا ورتالىقتارىن قالىپتاستىرۋ، قاتىسۋشىلارعا ءوز ونىمدەرىن كوممەرتسيالاندىرۋ تۇرعىسىنان كومەكتەسۋ شارالارىن قامتيدى.
بۇدان بولەك، كرەاتيۆتى يندۋستريانى دامىتۋعا ىقپال ەتەتىن ارنايى زاڭدى تۇلعا («كرەاتيۆتى يندۋستريالاردى قولداۋ قورى») قىزمەت كورسەتەدى. قور تالانتتاردى ىزدەپ، ولاردى ناسيحاتتاۋمەن، كرەاتيۆتى جوبالار مەن قىزمەتتەردى كوممەرتسيالاندىرۋ ىسىنە كومەكتەسۋمەن، سونداي-اق ولاردى الەم نارىقتارىندا ىلگەرىلەتۋمەن اينالىسادى.
سونىمەن قاتار ۋاكىلەتتى ورگانعا (مادەنيەت جانە اقپارات مينيسترلىگى) كرەاتيۆتى يندۋسترياعا مەملەكەتتىك قولداۋ كورسەتۋ، ىنتالاندىرۋ قاعيدالارىن ازىرلەۋ جانە بەكىتۋ قۇزىرەتى بەرىلەدى. ال وبلىستىڭ، رەسپۋبليكالىق ماڭىزى بار قالالار مەن استانانىڭ جەرگىلىكتى اتقارۋشى ورگاندارى كرەاتيۆتى يندۋستريا سالاسىنداعى مەملەكەتتىك ساياساتتى ىسكە اسىرادى.
زاڭنىڭ ءماتىنى باسپا سوزدە جاريالانادى.
ايتا كەتەيىك، بۇعان دەيىن مەملەكەت باسشىسى «ءبىر تاراپتان ەۋرازيالىق ەكونوميكالىق وداق پەن وعان مۇشە مەملەكەتتەر جانە ەكىنشى تاراپتان سينگاپۋر رەسپۋبليكاسى اراسىنداعى جان-جاقتى ەكونوميكالىق ىنتىماقتاستىق تۋرالى نەگىزدەمەلىك كەلىسىمدى جانە ءبىر تاراپتان ەۋرازيالىق ەكونوميكالىق وداق پەن وعان مۇشە مەملەكەتتەر جانە ەكىنشى تاراپتان سينگاپۋر رەسپۋبليكاسى اراسىنداعى ەركىن ساۋدا تۋرالى كەلىسىمدى راتيفيكاتسيالاۋ تۋرالى» قازاقستان رەسپۋبليكاسىنىڭ زاڭىنا قول قويدى.
اۆتور
ەلميرا ورالبايەۆا
