پرەزيدەنت «ءبىر بەلدەۋ، ءبىر جول» جوبالارى جونىندە: مۇنىمەن توقتاپ قالمايمىز

مەملەكەت باسشىسى قاسىم- جومارت توقايەۆ «ءبىر بەلدەۋ، ءبىر جول» باستاماسى ەلدەر اراسىنداعى مادەني- گۋمانيتارلىق بايلانىستاردى دامىتۋعا، تاتۋ كورشىلىك قاتىناستاردى، دوستىق پەن ءوزارا تۇسىنىستىكتى نىعايتۋعا ەلەۋلى ۇلەس قوساتىنىن اتاپ ءوتتى، دەپ حابارلايدى Кazinform اقورداعا سىلتەمە جاساپ.

«ءبىر بەلدەۋ، ءبىر جول» ۇلى جىبەك جولى رەنەسسانسىنا تىڭ سەرپىن بەردى دەسەك، ارتىق ايتقانىمىز ەمەس. سوندىقتان قىتايدىڭ بۇل باستاماسى – 21 - عاسىردىڭ مەگاجوباسى. بۇل - ءادىل باعا»، - دەدى پرەزيدەنت بەيجىڭدە ءوتىپ جاتقان جوعارى دەڭگەيدەگى «ءبىر بەلدەۋ، ءبىر جول» Ⅲ فورۋمىندا.

مەملەكەت باسشىسى قازاقستاننىڭ جەتىستىكتەرى جونىندە دە ايتتى. وسى رەتتە، پرەزيدەنتتىڭ پىكىرىنشە، ەۋرازيا كىندىگىندە ورنالاسقان ەلىمىز، سولتۇستىك پەن وڭتۇستىكتى، باتىس پەن شىعىستى بايلانىستىرا وتىرىپ، باستامانى ىسكە اسىرۋدا ەرەكشە ءرول اتقارادى. ايتۋىنشا، قىتايمەن ارادا سوزىلىپ جاتقان ورتاق شەكاراسى بار ءارى اۋماعى ۇلكەن قۇرلىقىشىلىك مەملەكەت رەتىندە قازاقستان حالىقارالىق ماڭىزعا يە كولىك- لوگيستيكالىق توراپقا اينالۋعا بارىنشا كۇش سالىپ وتىر.

«بۇگىندە قىتايدان ەۋروپاعا جاسالاتىن جەرءۇستى ترانزيتتىك تاسىمالدىڭ 85 پايىزعا جۋىعى قازاقستان اۋماعى ارقىلى وتەدى. كولىك- ترانزيت سالاسىنىڭ دامۋىنا باسا ءمان بەرە وتىرىپ، سوڭعى 15 جىلدا ءبىز وسى ماقساتتارعا 35 ميلليارد دوللاردان استام قاراجات بولدىك. ليانيۋنگانداعى قازاق- قىتاي لوگيستيكالىق ورتالىعى، «قورعاس» قۇرعاق پورتى، باتىس ەۋروپا - باتىس قىتاي ترانزيتتىك ماگيسترالى، قىتايدان يرانعا باراتىن تەمىرجول ءدالىزى سياقتى ءىرى ينفراقۇرىلىمدىق جوبالار ىسكە قوسىلدى. ءبىز مۇنىمەن توقتاپ قالمايمىز»، - دەدى قاسىم- جومارت توقايەۆ.

قازاقستان پرەزيدەنتى ءۇش جىل ىشىندە 1300 شاقىرىم جاڭا تەمىرجول جول سالۋعا، قىتايمەن شەكارادا ءۇشىنشى تەمىرجول وتكىزۋ پۋنكتىن اشۋعا، «باقتى» جانە «قالجات» جاڭا قۇرعاق پورتتارىنىڭ قۇرىلىسىنا قاتىستى جوسپارىن ورتاعا سالدى. بۇل - قازاقستاننىڭ ءىرى ەكونوميكالىق جوبالارى قىتايدىڭ جاھاندىق باستاماسىمەن ۇشتاساتىنىن انىق كورسەتەدى.

اۆتور

گۇلميرا الياكپاروۆا