پرەزيدەنت باتىس قازاقستان وبلىسىنىڭ سۋ باسقان اۋماقتارىن تىكۇشاقپەن ارالادى
استانا. KAZINFORM - مەملەكەت باسشىسىنىڭ باتىس قازاقستان وبلىسىنا جۇمىس ساپارى قارعىن سۋ باسقان اۋماقتاردى تىكۇشاقپەن ارالاپ كورۋدەن باستالدى. اقوردانىڭ باسپا ءسوز قىزمەتى مالىمدەدى.
قاسىم-جومارت توقايەۆ تەرەكتى، سىرىم جانە قاراتوبە اۋداندارىنداعى قالىپتاسقان جاعدايمەن تانىستى.
«وبلىس اكىمى ناريمان تورەعاليەۆ پرەزيدەنتكە بۇگىندە 6 اۋدان مەن ورال قالاسىن سۋ باسقانىن باياندادى. قارعىن سۋ 552 تۇرعىن ۇيگە، 427 ساياجاي تەلىمىنە زيان كەلتىرگەن.
ءوڭىر باسشىسىنىڭ ايتۋىنشا، سۋ تاسقىنىنا قارسى شارالارعا 1911 ادام، 332 تەحنيكا، 101 موتوپومپا، 1 تىكۇشاق جۇمىلدىرىلعان. سونىمەن قاتار قۇتقارۋ جۇمىستارىنا الماتى جانە ماڭعىستاۋ وبلىستارىنىڭ قۇتقارۋشىلارى اتسالىسىپ جاتىر. قارعىن سۋ باسقان اۋماقتاردان 7 مىڭعا جۋىق تۇرعىن كوشىرىلگەن، جەدەل-ەۆاكۋاتسيالاۋ پۋنكتتەرى قۇرىلعان. زارداپ شەككەندەرگە ءبىرجولعى ماتەريالدىق كومەك كورسەتۋ ءۇشىن جەرگىلىكتى بيۋدجەت ەسەبىنەن 63 ميلليون تەڭگە قارجى ءبولىندى. سۋ ايداۋ، نىسانداردىڭ جان-جاعىن توپىراقپەن قورشاۋ جانە سۋ جۇرەتىن قۇبىرلاردى كەڭەيتۋ جۇمىستارى جۇرگىزىلىپ جاتىر» - دەلىنگەن حابارلامادا.
اۆتور
باقىتگۇل اباي قىزى
