پرەزيدەنت بالالاردى جاڭا جىل مەرەكەسىمەن قۇتتىقتادى
ەلوردادا ەل پرەزيدەنتى اتىنان «جاڭا جىل رەسپۋبليكا تورىندە» اتتى رەسپۋبليكالىق شىرشا مەرەكەسى وتۋدە. وعان ەلىمىزدىڭ بارلىق وڭىرىنەن 100-دەن استام بالا جينالدى، دەپ حابارلايدى Kazinform.
شىرشاعا شاقىرىلعان بالالارعا مەملەكەت باسشىسى قاسىم-جومارت توقايەۆتىڭ اتىنان قۇتتىقتاۋ حات تابىس ەتىلدى.
«اينالايىن بالاقاي! سەنى جاڭا جىل مەرەكەسىمەن قۇتتىقتايمىن! وسى تاماشا مەيرام ءوزىڭدى قۋانىش پەن شاتتىققا بولەسىن! ءومىرىڭ جارقىن ساتتەرگە تولى بولسىن! كىتاپ وقى، سپورتپەن شۇعىلدان، تابيعاتتى ايالا جانە جاقسىلىق جاساۋعا ۇمتىل! ءبىلىمپاز، ەڭبەكقور، ادال ازامات بول! اسقاق ارماندارىڭ اقيقاتقا اينالسىن! ساعان زور دەنساۋلىق، تولاعاي تابىس تىلەيمىن!»، - دەپ جازدى پرەزيدەنت بالالارعا ارنالعان قۇتتىقتاۋىندا.
بالالارمەن بىرگە شىرشا شامىن جاعۋعا ق ر وقۋ-اعارتۋ ءمينيسترى عاني بەيسەمبايەۆ قاتىستى.
«بۇگىن وزدەرىڭىز سىندى 6 ميلليوننان استام بالا جاڭا جىل مەرەكەسىن تويلاۋدا جانە رەسپۋبليكامىزدىڭ 20 وڭىرىنەن جۇزدەگەن بالا وسى پرەزيدەنت شىرشاسىنا قاتىسىپ، ۇلكەن مەرەكەلى تويدى بىرگە وتكىزۋدەمىز. جالپى سىزدەر وسى ءۇش كۇن بويى اسەم قالامىز استانانىڭ ەڭ كورىكتى جەرلەرىن ارالادىڭىزدار. ونىڭ ىشىندە تاۋەلسىزدىك سيمۆولىنا اينالعان بايتەرەككە دە باردى دەپ ەستىپ وتىرمىن. مەملەكەت سىزدەردىڭ باقىتتى بالالىق شاقتى وتكىزۋلەرىڭىز ءۇشىن ايانباي بارلىق مۇمكىندىكتەردى جاساپ جاتىر. ەندىگى جەردە، قۇرمەتتى جاس دوستار، سىزدەر دە ساباقتارىڭىزدى بەسكە وقىپ، سانالى تاربيە الىپ، وسى ەلدىڭ بەدەلدى، مىقتى ازاماتى بولىپ وسۋلەرىڭىزگە بارلىق ماقسات- مۇراتتارىڭىزدى ارناۋعا تيىسسىزدەر»، - دەدى وقۋ- اعارتۋ ءمينيسترى.
سونىمەن بىرگە، عاني بەيسەمبايەۆ بالالارعا پرەزيدەنت قاسىم-جومارت توقايەۆ اتىنان سىيلىقتاردى تابىس ەتتى. ريۋكزاك ىشىندە پرەزيدەنتتىڭ قۇتتىقتاۋ اشىقحاتى، پلانشەت، تاتتىلەر جانە ەنتسيكلوپەديالىق كىتاپتار بار.
شىرشا سالتاناتىنا قاتىسۋشىلاردىڭ ىشىندە ون جاسار كاۋسار الماس قىزى دا بار. جەتىسۋ وبلىسى تالدىقورعان قالاسىنداعى №19 مەكتەپ-گيمنازياسىنىڭ 5-سىنىپ وقۋشىسى بۇل شارا ءۇشىن ارنايى ءوز قولىمەن 100 راۋشان گۇلىنەن ءساندى كويلەك تىگىپتى.
وتباسى ۇلگىسىندەگى بالالاردى قولداۋ ورتالىعىنىڭ تاريەلەنۋشىسى، ماڭعىستاۋ وبلىسىنان كەلگەن ۆيكتور باياركين پرەزيدەنتتەن شاقىرتۋ العانى ءۇشىن العىسىن ءبىلدىردى. ءۇشىنشى سىنىپ وقۋشىسى كاراتەمەن اينالىسادى جانە دومبىرادا وينايدى.
«شىرشا تويىنا قاتىسقانىم ءۇشىن اسا قۋانىشتىمىن. ونىڭ ۇستىنە بىزگە كوپتەگەن سىيلىقتار بەرىلدى. وسىنداي شەكسىز قۋانىش سىيلاعان پرەزيدەنتكە جانە بارشا قاتىسۋشىلارعا راحمەت ايتامىن»، - دەيدى ول.
بالالارعا ەلوردانىڭ ۇزدىك شىعارماشىلىق ۇجىمدارىع مارجان اراپبايەۆا، قاراقات ءابىلدينا، ەرجان ماكسيم سىندى تانىمال انشىلەر ونەر كورسەتتى. «استانا وپەرا» مەملەكەتتىك وپەرا جانە بالەت تەاترىنىڭ سوليستەرى «كۇلبيكەش» سپەكتاكلىنىڭ قويىلىمىن تارتۋ ەتتى.
ەسكە سالا كەتەيىك، بۇعان دەيىن وقۋ-اعارتۋ مينيسترلىگى جاڭا جىل مەرەكەسىنە كەلگەن قاتىسۋشىلار ءۇشىن استانا قالاسى بويىنشا ەكسكۋرسيا وتكىزگەن بولاتىن. بالالار ەلوردانىڭ ەڭ تانىمال ورىندارىنا باردى.
اۆتور
ايجان سەرىكجان قىزى
