پرەزيدەنت «اگروماش حولدينگ» اكسيونەرلىك قوعامىنىڭ لوكاليزاتسيا ورتالىعىنا باردى
قوستاناي. KAZINFORM - قاسىم-جومارت توقايەۆ قوستاناي وبلىسىنا جۇمىس ساپارى اياسىندا «اگروماشحولدينگ KZ» اكسيونەرلىك قوعامىنىڭ لوكاليزاتسيا ورتالىعىن ارالاپ كوردى، دەپ حابارلايدى اقوردانىڭ باسپا ءسوز قىزمەتى.
پرەزيدەنتكە دوڭگەلەكتى اۋىل شارۋاشىلىعى تەحنيكالارى مەن جالپى ماشينا جاساۋ سالاسى ءۇشىن قوسالقى بولشەكتەر شىعاراتىن كاسىپورىننىڭ جۇمىسى تانىستىرىلدى. بۇگىندە مۇندا 700 ادام ەڭبەك ەتەدى. زاۋىت جىلىنا 250 مىڭعا جۋىق بولشەك وندىرەدى. جىل باسىنان بەرى زاۋىتتان 1 مىڭعا جۋىق تراكتور مەن 300 كومباين شىعارىلعان.
پرەزيدەنتكە لوكاليزاتسيا ورتالىعى CLAAS تراكتورلارى مەن كومبايندارىنىڭ ءبىرقاتار قوسالقى بولشەگىن دايىنداۋعا تاپسىرىس العانى جونىندە باياندالدى. بۇدان بولەك، جۋىردا اسپالى جانە تىركەمەلى تەحنيكالاردى وندىرۋدە الەمدە ۇزدىك سانالاتىن AMAZONE كومپانياسىمەن كەلىسىمشارتقا قول قويىلادى. بيىل زاۋىتتا ءدان سەبۋ جانە بۇركۋ قوندىرعىلارىنىڭ ءوندىرىسى دە ىسكە قوسىلماق.
مەملەكەت باسشىسىنا ورتالىق قازىرگى ۋاقىتتا KIA كومپانياسىمەن بىرلەسىپ، 2025 -جىلى ىسكە قوسىلاتىن جاڭا زاۋىتتىڭ قۇرامداس بولىكتەرىنە ارنالعان جابدىقتار ءوندىرۋ جۇمىستارىن باستاعانى تۋرالى مالىمەت بەرىلدى.
قاسىم-جومارت توقايەۆ كاسىپورىننىڭ ەڭبەك ۇجىمىمەن جۇزدەستى. زاۋىت جۇمىسشىلارى پرەزيدەنتتىڭ قازاقستان حالقىنا ارناعان جولداۋىن زور ىقىلاسپەن تىڭداعانىن، اسىرەسە، جۇمىسشى مامانداردىڭ بەدەلى ارتا تۇسەتىنىنە ەرەكشە قۋانعاندارىن جەتكىزدى.
مەملەكەت باسشىسى ورتالىق جۇمىسشىلارىمەن اڭگىمەلەسۋ بارىسىندا وندىرىستەگى جەرگىلىكتى ۇلەستى ارتتىرۋ، بىلىكتى ماماندار دايارلاۋ جانە اۋىل شارۋاشىلىعى تەحنيكالارىن جاڭارتۋ قاجەت ەكەنىنە توقتالدى.
- ەلىمىزدە توزىعى جەتكەن تەحنيكالار وتە كوپ. كەيبىر مامانداردىڭ ايتۋىنشا، ول 80 پايىزعا دەيىن جەتكەن. قازاقستاندا شىعارىلعان تەحنيكانىڭ ەسەبىنەن بارلىق پاركتى جاڭارتاتىن ۋاقىت كەلدى. قازىر كوللەدجدەردە جۇمىسشى ماماندىقتار بويىنشا ءبىلىم العان جاستاردىڭ وندىرىسكە كەلگەنى قۋانتادى، - دەدى قاسىم-جومارت توقايەۆ.
ءوز كەزەگىندە زاۋىت ەڭبەككەرلەرى ماشينا جاساۋشىلاردىڭ اتىنان پرەزيدەنتكە جۇمىسشى ماماندارعا قولداۋ كورسەتكەنى ءۇشىن العىس ايتتى.
مەملەكەت باسشىسى قاسىم-جومارت توقايەۆ قوستاناي وبلىسىنداعى KIA اۆتوموبيلدەرىن شىعاراتىن زاۋىتتىڭ قۇرىلىس الاڭىنا بارعانىن جازعان ەدىك.
اۆتور
ەلميرا ورالبايەۆا
