پرەزيدەنت اقتوبەنىڭ جەدەل باسقارۋ ورتالىعىنا باردى
اقتوبە. KAZINFORM - مەملەكەت باسشىسى اقتوبە قالالىق پوليتسيا دەپارتامەنتىنىڭ جەدەل باسقارۋ ورتالىعىنىڭ عيماراتىن ارالاپ كوردى، دەپ حابارلايدى اقوردانىڭ باسپا ءسوز قىزمەتى.
نىسان وڭىردەگى 15 مىڭعا جۋىق بەينەكامەرا ارقىلى جەرگىلىكتى جەردەگى احۋالدى ناقتى ۋاقىت رەجيمىندە تاۋلىك بويى باقىلاۋعا مۇمكىندىك بەرەدى.
ورتالىقتىڭ جەدەل زالىندا 32 ينسپەكتور مەن «102» شۇعىل جەلىسىنىڭ 3 وپەراتورى جۇمىس ىستەيدى.
قاسىم-جومارت توقايەۆقا ىشكى ىستەر ءمينيسترىنىڭ ورىنباسارى ساكەن سارسەنوۆ پوليتسيا قىزمەتىندە قولدانىلىپ جاتقان سيفرلىق جوبالار تۋرالى باياندادى.
قازىر اقتوبە وبلىسىندا 5 جەدەل باسقارۋ ورتالىعى جۇمىس ىستەپ تۇر. وسى ورتالىقتار ارقىلى وڭىردە 1,8 مىڭ قىلمىستىق قۇقىق بۇزۋشىلىق اشىلىپ، 187 مىڭ جول ءجۇرۋ ەرەجەسىن بۇزۋ فاكتىسى انىقتالعان.
سونىمەن قاتار پرەزيدەنتكە ىشكى ىستەر ورگاندارى قىزمەتىنىڭ تيىمدىلىگىن ارتتىرۋ ءۇشىن جاساندى ينتەللەكت تەحنولوگياسى قولدانىلا باستاعانى تۋرالى مالىمەت بەرىلدى.
اتالعان تەحنولوگيا باقىلاۋ كامەرالارىنداعى بەينەگە تالداۋ جۇرگىزىپ، جوعالىپ كەتكەن ازاماتتاردى تابۋعا كومەكتەسەدى. سونىمەن قاتار ارنايى پلاتفورماعا جۇكتەلگەن فوتوسۋرەتتەر ارقىلى كۇدىكتىلەردىڭ بەت-بەينەسىن تانىپ، قاجەتتى مالىمەتتەردى دە ۇسىنادى. بۇدان بولەك جول ءجۇرۋ ەرەجەسىن بۇزۋ فاكتىلەرىن تىركەپ، كولىك قوزعالىسىن قاداعالاۋعا جاردەمدەسەدى.
مەملەكەت باسشىسى وسى باعىتتاعى جۇمىستى جالعاستىرۋ قاجەت ەكەنىن ايتىپ، قوعامدا زاڭ مەن ءتارتىپتىڭ ۇستەمدىگىن قامتاماسىز ەتۋدىڭ ماڭىزىنا نازار اۋداردى.
