رينات زايتوۆ تاسقىننان زارداپ شەككەن تۇرعىندارعا نەسيە كانيكۋلىن جاريالاۋدى ۇسىندى

استانا. KAZINFORM - ءماجىلىس دەپۋتاتى پرەمەر-مينيستر ولجاس بەكتەنوۆتىڭ اتىنا جولداعان ساۋالىندا تاسقىننان زارداپ شەككەن تۇرعىندارعا نەسيە كانيكۋلىن جاريالاۋدى ۇسىندى.

«اپات سالدارىنان زارداپ شەككەن حالىق ءوز شىعىندارىنىڭ قالاي ەسەپتەلىپ، قالاي وتەلەتىنىن ءالى دە تولىق بىلمەيدى. ويتكەنى، شارالاردىڭ ناقتى الگوريتمى جاسالماعان، كوميسسيا قالاي قۇرىلىپ، قالاي جۇمىس ىستەيتىنى جايلى حالىققا دۇرىس حابارلانباعان. سول سەبەپتەن كوميسسيا جۇمىسىن جەڭىلدەتىپ، حالىقپەن تىكەلەي بايلانىستىرۋ ماقساتىندا ونىڭ قۇرامىنا ەل سەنىمىنە يە بولعان جەرگىلىكتى بەلسەندى ازاماتتاردى قوسۋ كەرەك دەپ ەسەپتەيمىز.

اپات بولعان ايماقتاردىڭ تۇرعىندارىنا ۋاقىتشا نەسيەلىك كانيكۋلداردى جان-جاقتى قاراستىرۋدى سۇرايمىز. سونىمەن قاتار، باسپاناسىنان ايىرىلعان ازاماتتاردى وڭتايلى ورنالاستىرۋدى جەدەلدەتۋدى سۇرايمىز»، - دەدى دەپۋتات.

ونىڭ سوزىنشە، تاسقىننىڭ بۇگىنگىدەي اۋقىم الۋىنا ادامي سالعىرتتىقتار دا «ۇلەس قوسىپ» جاتىر.

«دالەلىمەن ايتساق، اتىراۋ وبلىسى مەن قۇلسارى قالاسىنىڭ ماڭىنان زاڭسىز سالىنعان سۋ بوگەتتەرى، جەرگىلىكتى بيلىكتىڭ كوكتەمگى سۋ تاسقىنىنا ءالسىز ازىرلەنگەنى، سىن ساعاتتا ابدىراعان جۇرتتىڭ ارەكەتىن ۇيلەستىرە الماۋى دا وسىنداي سالدارعا اكەلىپ سوقتى.

«بورەنەدەن اتتايمىز» - دەپ ەسەپ بەرىپ، سىرىڭكەگە سۇرىنە بەرەتىن مەملەكەتتىك ورگانداردىڭ شالاعايلىعى جاۋاپقا تارتپاسا جالعاسا بەرەدى.

سوندىقتان، پرەزيدەنتىمىز ايتقانداي جاۋاپكەرشىلىك الۋدان قاشىپ، جۇمىستى ءبىر- بىرىنە سىلتەپ وتىراتىن قىزمەتكەرلەر مەن جەرگىلىكتى ءىرى كومپانيالار ارەكەتتەرى جازالانۋى ءتيىس»، - دەدى رينان زايتوۆ.

اۆتور

ەسىمجان ناقتىباي