ۇرىپ-سوعىپ، بايلاپ كەتكەن: الماتى وبلىسىنداعى 4 بالانىڭ جاعدايى قالاي

قونايەۆ. KAZINFORM - الماتى وبلىسىنىڭ دارىگەرلەرى، بەلگىسىز ەر ادامنان تاياق جەگەن بالالاردىڭ جاعدايى تۋرالى ايتتى.

ءوڭىردىڭ دەنساۋلىق ساقتاۋ باسقارماسىنىڭ مالىمەتىنشە، 15-اقپان كۇنى كەشكى ساعات 19:40 شاماسىندا جامبىل اۋدانى ورتالىق اۋداندىق اۋرۋحاناسىنىڭ قابىلداۋ بولىمىنەن جەدەل جاردەم 4 بالانى جەتكىزدى.

«12-13 جاس ارالىعىنداعى ەكى بالانىڭ جۇمساق تىندەرى كوگەرگەن. بارلىق مەديتسينالىق تەكسەرۋلەردەن كەيىن ولار امبۋلاتورلىق ەمدەۋگە جىبەرىلدى. ءۇشىنشى 10 جاستاعى بالانى حيرۋرگ-تراۆماتولوگ دارىگەرلەر قاراپ شىقتى. ونىڭ دەنەسىنەن جاراقات انىقتالمادى. بالانى قوسىمشا قاراۋ ءۇشىن سوت-مەديتسينالىق ساراپتاماعا جىبەرىلدى»، - دەپ اتاپ ءوتتى ۆەدومستۆودان.

8 جاستاعى بالا اۋرۋحاناعا جاتقىزىلدى.

«بالا وبلىستىق بالالار كلينيكالىق اۋرۋحاناسىنا جاتقىزىلدى. كىشكەنتاي ناۋقاسقا ميدىڭ كومپيۋتەرلىك توموگرافياسى جانە ءىش قۋىسىنا ۋلترادىبىستىق زەرتتەۋ جاسالدى. بالادا كوپتەگەن جۇمساق تىندەردىڭ كوگەرۋى، تەرى استىنداعى گەماتومالار، ەرىننىڭ جانە مويىن ايماعى سىرىلعان»، - دەپ تولىقتىردى دەنساۋلىق ساقتاۋ باسقارماسىنان.

بۇعان دەيىن الەۋمەتتىك جەلىدە بالالاردىڭ سوققىعا جىعىلعانى تۋرالى ۆيدەو تارادى. وندا اياق-قولى بايلانىپ، بەت-اۋزى كوگەرگەن كىشكەنتاي ۇل مەن قىز بالانىڭ قاتتى شوشىنىپ، سويلەي الماي جاتقان جانە ولارعا كورشىلەرىنىڭ كومەك كورسەتىپ جاتقان ءساتى تۇسكەن.

كەيىن الماتى وبلىسىنىڭ باس پوليتسەيى باۋىرجان الەنوۆ كۇدىكتىنىڭ ۇستالعانىن جەتكىزدى.

اۆتور

الما مۇقانوۆا