پروكۋور ق. بيشىمبايەۆتىڭ باستى قاتەلىگىن اتادى

استانا. KAZINFORM - استانالىق سوتتا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءىسى بويىنشا تاراپتاردىڭ جارىسسوزدەرى باستالدى. ەڭ الدىمەن پروكۋرور ايجان ايماعانوۆا سويلەدى.

«ءبىز تۇتاس پروتسەسس بويى بيشىمبايەۆتىڭ وزىنە ىڭعايسىز سۇراقتاردى اينالىپ ءوتىپ، اشىقتىعىن كورسەتىپ، قاتەلەسپەۋگە تىرىسىپ، شەبەر وتىرىك ايتقانىن بايقاپ وتىرمىز. ءبىراق ول ءبىر قاتەلىك جىبەردى»، - دەدى مەملەكەتتىك ايىپتاۋشى.

ونىڭ ايتۋىنشا، بيشىمبايەۆتىڭ ۇيالى تەلەفونىنان سالتاناتتى ازاپتاعان ساتتەرى بار بەينەماتەريال تابىلعاندا كىناسىزدىگى تۋرالى بارلىق نۇسقاسى بىردەن قيرادى.

«ول ۇيالى تەلەفوننىڭ قۇپياسوزىن بەرگەندە بۇل ۆيدەولاردى تۇسىرگەنىن، ءبارى ساقتالىپ تۇرعانىن ۇمىتىپ كەتكەن. نەلىكتەن؟ ويتكەنى ول مۇنى ۇنەمى جاساپ كەلگەن، قىراعىلىعى السىرەپ، ەسىنەن شىعىپ كەتكەن. بۇل ۆيدەولار تابىلعان ساتتەگى بيشىمبايەۆتىڭ رەاكسياسىن بارلىعى بايقادى. ول ابدىراپ، باسىن ۇستاپ، مونتاج ەكەنىن ايتا باستادى. ءبىراق كەيىن 10 مينۋتتىق ءۇزىلىستى پايدالانىپ، ۆيدەونى ءوزى تۇسىرگەنىن مويىندادى»، - دەدى ا. ايماعانوۆا.

پروكۋرور تاڭعى 6:43-تەن 8:24-كە دەيىنگى ارالىقتا 20-دان استام ۆيدەودا ەكس- مينيستر سالتاناتتى ۇرىپ- سوعىپ، ازاپتاعانىن اتاپ ءوتتى.

«بيشىمبايەۆ - شەتەلدە وقىعان، اۋقاتتى وتباسىندا دۇنيەگە كەلگەن جوعارى ءبىلىمدى ادام، بۇرىنعى ەكونوميكا ءمينيسترى، ەلىمىزدىڭ بەت- بەينەسى. ول جاي عانا كەشىرىم الۋعا لايىق ەمەس، ءوز ارەكەتى ءۇشىن ەكى ەسە جاۋاپ بەرۋى كەرەك»، - دەپ تولىقتىردى پروكۋرور.

اۆتور

ايجان سەرىكجان قىزى