ەردوعان ب ۇ ۇ مىنبەرىنەن الەم ەلدەرىن پالەستينانى مويىنداۋعا شاقىردى
استانا. KAZINFORM - تۇركيا پرەزيدەنتى رەجەپ تايپ ەردوعان پالەستينا مەملەكەتىن ءالى مويىنداماعان ەلدەردى ءوز شەشىمىن قايتا قاراۋعا شاقىردى. بۇل تۋرالى ول ب ۇ ۇ باس اسسامبلەياسىنىڭ 81-سەسسياسىندا سويلەگەن سوزىندە مالىمدەدى، دەپ حابارلايدى انادولۋ اگەنتتىگى.
- بۇگىندە پالەستينا مەملەكەتىن ءالى مويىنداماعان بارلىق ەلدەردى ءوز شەشىمىن قايتا قاراۋعا شاقىرامىن، - دەدى تۇركيا باسشىسى.
ەردوعان پالەستينا پرەزيدەنتى ماحمۇد ابباستىڭ ب ۇ ۇ وتىرىسىنا قاتىسا الماعانىنا قاراماستان، تۇركيا بۇعان دەيىنگى جىلداعىداي پالەستينانىڭ ەركىندىگى مەن ەگەمەندىگىن قورعاۋدى جالعاستىراتىنىن ايتتى. ول 1967 -جىلعى شەكارا نەگىزىندە، استاناسى شىعىس يەرۋساليم بولاتىن پالەستينا مەملەكەتى قۇرىلاتىن كۇندى اسىعا كۇتەتىنىن جەتكىزدى.
تۇركيا پرەزيدەنتى گازا سەكتورىنداعى جاعدايعا دا توقتالدى. ونىڭ ايتۋىنشا، گازا بالالار ەڭ كوپ قازا تاپقان ءارى امپۋتاتسيادان وتكەن بالالار سانى بويىنشا الەمدەگى ەڭ جوعارى كورسەتكىش تىركەلگەن ايماققا اينالعان. ەردوعان حالىقارالىق قاۋىمداستىقتى ونداعى جاعدايعا بەيجاي قاراماۋعا شاقىردى.
ول باتىس جاعالاۋدا قونىستانۋشىلاردىڭ زورلىق-زومبىلىعى كۇشەيگەنىن، ال يەرۋساليمدە مۇسىلماندار مەن حريستيانداردىڭ قاسيەتتى ورىندارعا كىرۋىنە كەدەرگى كەلتىرىلىپ جاتقانىن ايتتى.
ەردوعان سونىمەن بىرگە قازىرگى حالىقارالىق قاتىناستار جۇيەسىن رەفورمالاۋ قاجەت ەكەنىن مالىمدەدى. ول ب ۇ ۇ قاۋىپسىزدىك كەڭەسىن رەفورمالاپ، شەشىم قابىلداۋدا «بەستەن كوپ الەم» قاعيداتىن باسشىلىققا الۋعا شاقىردى. تۇركيا باسشىسىنىڭ ايتۋىنشا، الەمدەگى 190-نان استام ەلدىڭ تاعدىرى بەس مەملەكەتتىڭ شەشىمىنە تاۋەلدى بولماۋى ءتيىس.
تۇركيا پرەزيدەنتى حالىقارالىق قۇقىقتىڭ كۇشتى جانە ءالسىز مەملەكەتتەرگە ءارتۇرلى قولدانىلماۋى كەرەكتىگىن ايتىپ، پالەستينا، ليۆان جانە سۋداندا ب ۇ ۇ- دان كومەك كۇتكەن ادامداردىڭ كوڭىلى قالعانىن جەتكىزدى.
ەردوعان سونداي-اق سيرياداعى جاعدايعا، رەسەي مەن ۋكراينا اراسىنداعى قاقتىعىسقا، ليۆيا مەن كيپر ماسەلەلەرىنە توقتالدى. ول ورمۋز بۇعازىندا كەمە قاتىناسىنىڭ ەركىندىگىن قامتاماسىز ەتۋگە شاقىردى.
بۇعان قوسا تۇركيا باسشىسى ەۋروپانىڭ قاۋىپسىزدىگىنە قاتىستى انكارانىڭ ءرولىن اتاپ ءوتىپ، تۇركيانى ەۋروپانىڭ قاۋىپسىزدىك ارحيتەكتۋراسىنان تىس قالدىرۋ ونىڭ كۇشەيۋىنە مۇمكىندىك بەرمەيتىنىن ايتتى.
ەسكە سالا كەتسەك، بۇعان دەيىن ب ۇ ۇ باس اسسامبلەياسى 81-سەسسياسىنىڭ اشىلۋىنا قازاقستان دەلەگاتسياسى دا قاتىسىپ جاتقانىن جازدىق.
سەسسيانىڭ اشىلۋىندا ءسوز سويلەگەن ترامپ ب ۇ ۇ مىنبەرىنەن يراندى «جويىپ جىبەرەمىن» دەپ كەزەكتى مارتە مالىمدەدى.
