ەۋروپادا گاز باعاسى شارىقتادى

استانا. KAZINFORM - ەۋروپادا تابيعي گاز باعاسى 2023 -جىلدىڭ قازان ايىنان بەرى ەڭ جوعارى دەڭگەيگە كوتەرىلدى. وعان جاڭا جىل كۇنى رەسەي گازىنىڭ ۋكراينا ارقىلى ەۋروپاعا جەتكىزىلىمىن توقتاتۋى سەبەپ بولىپ وتىر.

نيدەرلاند TTF بيرجاسىندا جانارماي باعاسى %4- دان اسىپ، مەگاۆاتت ساعاتىنا 51 ەۋروعا دەيىن كوتەرىلدى. بۇل - 2023 -جىلدىڭ قازان ايىنان بەرى ەڭ جوعارى كورسەتكىش، دەپ حابارلايدى Euronews.

بەيسەنبى كۇنى تاڭەرتەڭگى مالىمەتتەرگە سايكەس، ەۋرووداق تابيعي گاز يمپورتىنىڭ %5- عا جوعالۋىنا بايلانىستى باعانى كوتەردى. ويتكەنى رەسەي يمپورتى 1 -قاڭتاردان باستاپ ۋكراينا ارقىلى ەۋروپالىق وداققا گاز جەتكىزۋدى توقتاتتى.

قۇنعا نورۆەگيانىڭ حاممەرفەست قالاسىنداعى ستگ (سۇيىتىلعان تابيعي گاز) زاۋىتىنىڭ توقتاتىلۋى دا اسەر ەتتى، ول كومپرەسسوردىڭ ىستەن شىعۋىنا بايلانىستى ءوندىرىستى 9 -قاڭتارعا دەيىن توقتاتقان.

بۇعان قوسا، كەيىنگى اپتالارداعى سۋىق اۋا رايىنا بايلانىستى ەۋروپانىڭ گاز قورى 2021 -جىلدان بەرى ەڭ جىلدام قارقىنمەن، شامامەن %75- عا ازايعان.

Gas Infrastructure Europe سالالىق ورگانىنىڭ مالىمەتى بويىنشا، بلوك قويمالارىنداعى گازدىڭ كولەمى قىركۇيەك ايىنىڭ سوڭىنان بەرى شامامەن %19- عا تومەندەگەن.

رەسەيدەن ۋكراينا ارقىلى گاز جەتكىزىلۋىنىڭ توقتاتىلۋى ورتالىق ەۋروپا ەلدەرىنە قاتتى اسەر ەتتى. «تۇرىك اعىنى» بالامالى باعىتى بولعانىمەن، بۇل ۋكراينا باعىتىنىڭ ورنىن تولىق وتەۋگە جەتكىلىكسىز. اسىرەسە ۆەنگريا مەن سلوۆاكياعا ايتارلىقتاي اسەر ەتەدى، ۋكراينانىڭ ترانزيتتىك جولى 2023 -جىلى ولاردىڭ گاز قاجەتتىلىگىنىڭ %65- عا قامتاماسىز ەتكەن.

ەۋروكوميسسيا جاعدايعا بايلانىستى بىرنەشە شەشىمدەردى ۇسىندى، سونىڭ ىشىندە ترانس-بالقان باعىتى ارقىلى گرەك، تۇرىك جانە رۋمىن گازىن جەتكىزۋمەن قاجەتتىلىكتەردى قاناعاتتاندىرۋ كەرەكتىگى ايتىلعان.

تۇتاستاي العاندا، ە و بيىلعى قىستا گاز قورى تاۋسىلادى دەگەن قاۋىپ جوق، ءبىراق قويما قورلارىن تولىقتىرۋ كۇتكەننەن دە قىمباتقا ءتۇسۋى مۇمكىن.

ايتا كەتەيىك، ەلىمىزدە سۇيىتىلعان گاز باعاسىن 2030-جىلعا دەيىن مەملەكەت رەتتەيتىن بولدى.