ەۋروپاعا جۇك جەتكىزۋدىڭ قوسىمشا باعدارى: جۇرگىزۋشىلەرگە ۆيزاسىز رەجيم بەرىلەدى
استانا. KAZINFORM – ق ر كولىك مينيسترلىگى قازاقستاننان اۆتوكولىكپەن ەۋروپاعا جۇك جەتكىزۋ ءۇشىن بالاما باعدار قاراستىرۋ ماسەلەسى بويىنشا تۇسىنىك بەردى.

- رەسەي مەن بەلارۋستى اينالىپ وتەتىن بالامالى ماشرۋتتى پىسىقتاۋ جۇمىستارى دا ءجۇرىپ جاتىر. بۇل بالامالى باعدار تۇرىكمەنستان، يران، تۇركيا اۋماقتارى ارقىلى ودان ءارى ەۋروپا مەملەكەتتەرىنە شىعۋدى كوزدەيدى. بۇل باعىتتا تاسىمالداردى جەڭىلدەتۋ ماقساتىندا مينيسترلىك تۇرىكمەنستانمەن اۆتوتاسىمالدارعا رۇقساتسىز جۇيە ورناتۋ ماسەلەسىن پىسىقتاپ، 2024 -جىلعى 10-قازاندا قازاقستان مەن تۇرىكمەنستان اراسىنداعى حالىقارالىق اۆتوموبيل تاسىمالدارى جونىندەگى ۇكىمەتارالىق كەلىسىمگە وزگەرىستەر ەنگىزۋ تۋرالى حاتتاماعا قول قويدى (قازىرگى كەزدە حاتتامانى راتيفيكاتسيالاۋ جۇمىستارى اتقارىلىپ وتىر). سونداي-اق قازىرگى ۋاقىتتا قازاقستان مەن تۇرىكمەنستان اراسىندا جۇرگىزۋشىلەر ءۇشىن ۆيزاسىز رەجيم ورناتۋ ماسەلەسى پىسىقتالىپ جاتىر، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
ۆەدومستۆو اقپاراتىنا قاراعاندا، يرانمەن اۆتوكولىكپەن جۇك تاسىمالدارىنا جىل سايىن جەتكىلىكتى كولەمدە رۇقسات بلانكىلەرىمەن الماسۋ جۇرگىزىلەدى جانە جۇرگىزۋشىلەر 15 كۇنگە دەيىن ۆيزادان بوساتىلعان.
- تۇركيامەن دە جىل سايىن اۆتوكولىكپەن جۇك تاسىمالدارىنا جەتكىلىكتى كولەمدە رۇقسات بلانكىلەرىمەن الماسۋ جۇرگىزىلەدى جانە ازاماتتارعا ۆيزا تالاپ ەتىلمەيدى، - دەپ اتالىپ وتكەن كولىك مينيسترلىگى مالىمەتىندە.
2023 -جىلدىڭ اياعىندا كولىك مينيسترلىگىنىڭ وكىلدەرى قازاقستان اۆتوكولىكپەن جۇك تاسىمالداۋ ءۇشىن رەسەي مەن بەلارۋستى اينالىپ وتەتىن بالاما باعدار قاراستىرىپ جاتقانى تۋرالى حابارلاعان ەدى.
بىلتىر كۇزدە قازاقستان مەن تۇرىكمەنستان اراسىندا «رۇقساتسىز» جۇك تاسىمالداۋ جۇيەسى ەنگىزىلەتىنى حابارلاندى.
اۆتور
رۋسلان عابباسوۆ