رەسەيدىڭ لەنينگراد وبلىسىنىڭ گۋبەرناتورى توقايەۆقا پۋتيننىڭ سالەمىن جەتكىزدى
استانا. KAZINFORM - مەملەكەت باسشىسى رەسەيدىڭ لەنينگراد وبلىسىنىڭ گۋبەرناتورى الەكساندر دروزدەنكونى قابىلدادى.
اقوردانىڭ باسپا ءسوز قىزمەتىنىڭ حابارلاۋىنشا، كەزدەسۋ بارىسىندا قازاقستان مەن رەسەيدىڭ ستراتەگيالىق سەرىكتەستىگىن دامىتۋدا ءوڭىرارالىق ىقپالداستىقتىڭ ماڭىزدى ءرول اتقاراتىنى اتاپ ءوتىلدى.
قاسىم-جومارت توقايەۆ لەنينگراد وبلىسىنىڭ ونەركاسىپ جانە كولىك-لوگيستيكا سالالارىنداعى ايتارلىقتاي الەۋەتىنە توقتالىپ، قازاقستان اتالعان ايماقپەن ءتيىمدى ىنتىماقتاستىق اياسىن كەڭەيتۋگە دايىن ەكەنىن راستادى.
پرەزيدەنتتىڭ ايتۋىنشا، لەنينگراد وبلىسىمەن ساۋدا-ەكونوميكالىق قارىم-قاتىناستار قارقىندى دامىپ كەلەدى. بىلتىر ءوزارا تاۋار اينالىمى 400 ميلليون دوللاردان اسقان.
الەكساندر دروزدەنكو قوناقجايلىق تانىتقانى ءۇشىن مەملەكەت باسشىسىنا العىس ايتىپ، رەسەي پرەزيدەنتى ۆلاديمير پۋتيننىڭ سالەمىن جەتكىزدى.
گۋبەرناتور ۇلى وتان سوعىسى جىلدارىندا لەنينگراد ءۇشىن شايقاسقان قازاقستاندىقتاردىڭ باتىرلىعى مەن قاھارماندىعىن ەرەكشە اتاپ ءوتتى. سونىمەن قاتار ولاردىڭ ەرلىگى تۋرالى ەستەلىكتەر كوزدىڭ قاراشىعىنداي ساقتالاتىنىنا نازار اۋداردى.
اڭگىمەلەسۋ بارىسىندا ونەركاسىپ، اتوم ەنەرگەتيكاسى، كولىك جانە اگروونەركاسىپ كەشەنى سالالارىندا بىرلەسكەن جوبالاردى جۇزەگە اسىرۋ پەرسپەكتيۆاسى، سونداي-اق مادەني-گۋمانيتارلىق باعىتتاعى ىنتىماقتاستىقتى تەرەڭدەتۋ مۇمكىندىكتەرى تالقىلاندى.
ەسكە سالايىق، بۇعان دەيىن پرەزيدەنت قاسىم-جومارت توقايەۆ كاسابلانكادا ءوتىپ جاتقان سەمسەرلەسۋ الەم كۋبوگى كەزەڭىنىڭ جەڭىمپازى اتانعان قازاقستان قۇراماسىن قۇتتىقتاعان ەدى.
