رەسەيدىڭ الماتىداعى باس كونسۋلدىعى قازاقستاننىڭ سىرتقى ىستەر مينيسترلىگىنە نوتا جولدادى

باس كونسۋلدىقتىڭ مالىمەتىنشە، رەسەي تاراپى ونەر يەسىنىڭ ۇستالعانى تۋرالى اقپاراتتى بۇقارالىق اقپارات قۇرالدارىنان بىلگەن. قازاقستان بيلىگىنەن بۇل تۋرالى رەسمي حابارلاما تۇسپەگەن. ءبىز جەرگىلىكتى بيلىكپەن رەسمي بايلانىس ورناتۋ ءۇشىن نوتا جولدادىق. ازاماتىمىزدىڭ قازىر قايدا ەكەنىن، قانداي جاعدايدا ۇستالىپ وتىرعانىن انىقتاپ، قاجەتتى جاعدايدا ونىمەن كونسۋلدىق كەزدەسۋ ۇيىمداستىرۋدى سۇرادىق، - دەپ حابارلادى رەسەيدىڭ الماتىداعى باس كونسۋلدىعى.

سونىمەن قاتار رەپەردىڭ قورعاۋشىلارى ونى قاماۋعا الۋ تۋرالى سوت شەشىمىنە اپەللياتسيالىق شاعىم دايىنداي باستاعانى حابارلاندى. ناۆاي باكيروۆ 13-قازاندا قىرعىزستاننان قازاقستانعا كىرەبەرىستەگى «قورداي» وتكىزۋ پۋنكتىندە ۇستالعان.

جامبىل وبلىستىق پوليتسيا دەپارتامەنتىنىڭ مالىمەتىنشە، ول مىنگەن كولىكتى تەكسەرۋ كەزىندە ەسىرتكى زاتى تابىلىپ، تاركىلەنگەن. ونەر يەسى ۋاقىتشا ۇستاۋ يزولياتورىنا قامالدى. ال 15-قازاندا سوت ونى قاماۋعا الۋعا سانكسيا بەردى. قازىر ەسىرتكى كونترابانداسى جانە ونى زاڭسىز ساقتاۋ دەرەكتەرىنە قاتىستى ەكى باپ بويىنشا تەرگەۋ جۇرگىزىلىپ جاتىر.

 ايتا كەتەيىك، Navai- ءدىڭ جەكە كونسەرتى 14-قازاندا استانادا ءوتۋى كەرەك ەدى. الايدا بيلەت ساتاتىن وپەراتور كونسەرت باستالۋىنا ءتورت ساعات قالعاندا ءىس- شارانىڭ «تەحنيكالىق سەبەپتەرگە بايلانىستى» وتپەيتىنىن حابارلادى. كورەرمەندەرگە بيلەتتەردى ساتىپ العان پلاتفورمالار ارقىلى اقشاسىن قايتارۋ ۇسىنىلدى.

 Navai (شىن ەسىمى - ناۆاي باحمان وگلى باكيروۆ) - ازەربايجان تەكتى رەسەيلىك تانىمال رەپ ورىنداۋشىسى، پوپ- ءانشى.