رەسەي ەۋروپالىق وداقتان قازاقستانعا جونەلتىلگەن 408 سيىردى كەرى قايتارعان
استانا. KAZINFORM - ءماجىلىستىڭ تاۋارلى ءسۇت فەرمالارىنىڭ سانىن كوبەيتۋگە ارنالعان جيىنىندا رەسەي فەدەراتسياسىنىڭ شەكاراداعى اكىمشىلىك كەدەرگىلەرى بىرنەشە جوبانى كەستەدەن كەشىكتىرىپ جاتقانى ءمالىم بولدى.
وڭىردەگى تاۋارلى ءسۇت فەرمالارىن قۇرۋعا باعىتتالعان جوبالاردىڭ جاي-كۇيى تۋرالى بايانداعان باتىس قازاقستان وبلىسى اكىمىنىڭ ورىنباسارى قاليار ايتمۇحامبەتوۆ رەسەي قابىلداعان تىيىمنىڭ كەسىرىنەن بىرنەشە جوبا كەستەدەن كەشىگىپ جاتقانىن ايتتى.
«تاۋارلى ءسۇت فەرماسىن سالۋعا اقشا سالعان 4 ينۆەستوردىڭ بىرەۋى قاجەتتى 99 مالدى تۇگەل جەتكىزدى. قالعاندارىندا قيىندىقتار تۋىنداپ وتىر. رەسەي فەدەراتسياسى بليۋتانگ ۆيرۋسىنا بايلانىستى مال ترانزيتىنە شەكتەۋ ورناتتى. مىسالى، «امانات» شارۋا قوجالىعى وسى جيىنعا قاتىسىپ وتىر. ماجارستان ەلىنەن 408 گولشتەين تۇقىمدى قۇناجىننىڭ تولىقتاي اقشاسىن تولەپ، كارانتيننەن وتكەننەن كەيىن 18 -قازاندا شىققان مال 21 -قازاندا رەسەي شەكاراسىنان كەرى قايتارىلدى. وسى ماسەلەنى شەشىپ بەرۋگە كومەك سۇرايمىز»، - دەدى ول.
بۇل پروبلەما تەك ب ق و فەرمەرلەرىن تىعىرىققا تىرەپ وتىرماعان كورىنەدى.
«اتامەكەن» ۇلتتىق كاسىپكەرلەر پالاتاسى اگروونەركاسىپ كەشەنى جانە تاماق ونەركاسىبى دەپارتامەنتىنىڭ ديرەكتورى ەركىن ناۋرىزبەكوۆ تا ماسەلەگە ۇكىمەت ارالاسۋ كەرەك دەپ وتىر.
«باتىس قازاقستان وبلىسىنىڭ اكىمدىگى كوتەرگەن ماسەلە شىنىمەن بار. رەسەي فەدەراتسياسىنىڭ اۋماعى ارقىلى وتەتىن مال ترانزيتىندە پروبلەما بار. بيىلعى 18-قازاننان باستاپ ولار ەۋروپا وداعىنان ءوز اۋماقتارى ارقىلى مال اكەلۋگە تىيىم ەنگىزگەن بولاتىن. مۇنى ولار ەپيزوتيكالىق جاعدايدىڭ ۋشىققانىمەن، بليۋتانگ دەيتىن مال اۋرۋىنا بايلانىستى دەپ ءتۇسىندىردى. پيلوتتىق جوباعا قاتىسىپ جاتقان شارۋالاردىڭ باسىم بولىگى مالدى ەۋروپالىق وداقتان اكەلۋدى جوسپارلاعان. ويتكەنى سول جاقتىڭ ءىرى قاراسى ونىمدىلىك پارامەترلەرى جوعارى ءارى ءبىزدىڭ كليماتقا بارىنشا بەيىمدەلگىش كەلەدى. اۋىل شارۋاشىلىعى مينيسترلىگىنە حابارلاعانبىز. ۇكىمەتتەن ماسەلەنى جەدەلدەتىپ شەشۋدى سۇرايمىز. ەرتەڭ اۋىل شارۋاشىلىعى ءمينيسترى ايداربەك ساپاروۆ رەسەيدىڭ مينيسترىمەن كەزدەسەدى. سول كەزدە وسى ماسەلەنى كوتەرۋدى سۇرايمىز»، - دەدى «اتامەكەن» وكىلى.
بۇعان دەيىن رەسەيگە باراتىن قازاقستاندىقتار بيومەتريالىق دەرەك ۇسىنۋ كەرەكتىگى ايتىلدى.
اۆتور
ەسىمجان ناقتىباي
