رەسەي قازاقستانداعى ا ە س قۇرىلىسىنا بايلانىستى ۇسىنىس جاسادى

استانا. AKAZINFORM - «روس اتوم» قازاقستاندا اتوم ەلەكتر ستانسياسىن سالۋعا ءوز قۇزىرەتىن بەرۋگە دايىن. بۇل تۋرالى قازاقستانعا جۇمىس ساپارىنىڭ قورىتىندىسى بويىنشا وتكەن باسپا ءسوز ءماسليحاتىندا رەسەي سىرتقى ىستەر ءمينيسترى سەرگەي لاۆروۆ ايتتى، دەپ جازادى تاسس.

«رەسەي (ا ە س قۇرىلىسىنا) كومەكتەسۋگە دايىن عانا ەمەس، رەسەي ءوز ۇسىنىستارىن جاساپ تا قويدى. ءبىز قازاقستان پرەزيدەنتى قاسىم-جومارت توقايەۆ وتكىزگەن رەفەرەندۋمدا ونىڭ اتوم ەنەرگەتيكاسىن دامىتۋ جوسپارلارىنىڭ قولداۋ تاپقانىن كوردىك. «روس اتوم» بۇل ماسەلەنى قازاقستاندىق ارىپتەستەرمەن شەشۋ ءۇشىن ءوز قۇزىرەتىن تولىق قامتاماسىز ەتۋگە دايىن»، - دەدى سەرگەي لاۆروۆ.

لاۆروۆ سونداي-اق رەسەيدىڭ «باسقا مەملەكەتتەردىڭ ءتيىستى مەكەمەلەرىمەن جانە قۇرىلىمدارىمەن ىنتىماقتاسۋعا» دايىن ەكەنىن ايتتى.

ايتا كەتەيىك، رەفەرەندۋم قورىتىندىسى بويىنشا قازاقستانداعى اتوم ەلەكتر ستانسياسىنىڭ قۇرىلىسىنا ازاماتتاردىڭ 71,12 پايىزى داۋىس بەرگەن.

اتوم ەلەكتر ستانسياسىنىڭ قۇرىلىسى جوباسىن جۇزەگە اسىرۋعا قىزىعۋشىلىق تانىتقان رەاكتورلار تەحنولوگياسىن جەتكىزۋشىلەردىڭ قىسقاشا ءتىزىمى قازىردىڭ وزىندە قالىپتاستى. تىزىمگە الەمنىڭ جەتەكشى ءتورت كومپانياسى كىرەدى: فرانسۋزدىق EDF، رەسەيدىڭ «روس اتوم» مەملەكەتتىك كورپوراتسياسى، كورەيالىق KHNP جانە قىتايلىق CNNC.

قازاقستان پرەزيدەنتى قاسىم-جومارت توقايەۆ بۇدان بۇرىن فرانسۋزدىق «Le Figaro» گازەتىندەگى «قازاقستان فرانسيانىڭ ستراتەگيالىق جانە سەنىمدى سەرىكتەسى» اتتى ماقالاسىندا اتوم ەلەكتر ستانسياسىن سالۋ تۋرالى شەشىم قابىلدانعاننان كەيىن قازاقستان فرانسيانىڭ اتوم ونەركاسىبىنە قولداۋ كورسەتەتىنىن ايتقان بولاتىن.

وڭتۇستىك كورەيا پرەزيدەنتى يۋن سوك يەل دە كورەيالىق كومپانيالاردىڭ قازاقستانداعى اتوم ەنەرگەتيكاسى جوبالارىنا قىزىعۋشىلىق تانىتاتىنىن مالىمدەدى.

بۇل رەتتە مەملەكەت باسشىسى بۇعان دەيىن قازاقستاندا اتوم ەلەكتر ستانساسىن حالىقارالىق كونسورتسيۋم سالۋ كەرەكتىگىن اتاپ وتكەن بولاتىن. اتوم ەلەكتر ستانسياسىن سالۋ جوباسى بويىنشا جەتكىزۋشىنى نەمەسە كونسورتسيۋمدى تاڭداۋ بويىنشا تۇپكىلىكتى شەشىم 2025 -جىلى قابىلدانادى، دەپ حابارلادى ەنەرگەتيكا مينيسترلىگى.

ايتا كەتەيىك، مەملەكەت باسشىسى رەسەيدىڭ سىرتقى ىستەر ءمينيسترى سەرگەي لاۆروۆتى قابىلدادى.

اۆتور

ەركەجان سماعۇلوۆا