رەسەي مەن ۋكراينا ەنەرگەتيكالىق نىساندارعا شابۋىل جاساماۋ تۋرالى كەلىستى - ترامپ

— رەسەي مەن ۋكراينا اراسىنداعى سوعىستا ەنەرگەتيكالىق نىساندارعا قاتىستى اتىستى توقتاتۋ رەجيمى دەرەۋ كۇشىنە ەنەدى. ەكى تاراپ تا كەلىستى. ونى بۇزباڭىزدار! — دەپ جازدى دونالد ترامپ Truth Social الەۋمەتتىك جەلىسىندە.

ترامپتىڭ ايتۋىنشا، بۇل كەلىسىم بىرنەشە اپتا بويى مۇناي وڭدەۋ زاۋىتتارى مەن ەلەكتر ستانسيالارىنا جاسالعان شابۋىلداردان كەيىن شيەلەنىستى باسەڭدەتۋگە باعىتتالعان. ونىڭ سوزىنشە، مۇنداي شابۋىلدار ديزەل وتىنىن جەتكىزۋگە كەدەرگى كەلتىرىپ، ا ق ش-تا باعانىڭ وسۋىنە ىقپال ەتىپ وتىر.

ەنەرگەتيكالىق ينفراقۇرىلىمعا شابۋىلداردى توقتاتۋ تۋرالى مالىمدەمە رەسەيدىڭ ديزەل وتىنىن ا ق ش پەن الەمدىك نارىقتارعا جەتكىزۋىنە مۇمكىندىك بەرەتىن كەلىسىم جاسالعان تۇستا ايتىلدى.

كەلىسىمگە سايكەس، رەسەي دەرەۋ 300 مىڭ توننادان استام ديزەل وتىنىن جەتكىزۋگە ءتيىس. قاراشا ايىندا قوسىمشا جەتكىزىلىمدەر كۇتىلەدى. ەكسپورتتى جەڭىلدەتۋ ءۇشىن ا ق ش سانكسيالىق شەكتەۋلەردى دە ۋاقىتشا جۇمسارتقان.

ۋكراينا پرەزيدەنتى ۆلاديمير زەلەنسكي بۇل جاڭالىققا قاتىستى پىكىر ءبىلدىرىپ، ۋكراينانىڭ ەنەرگەتيكالىق ءبىتىمدى قولدايتىنىن ايتتى. سونداي-اق رەسەي تاراپىنىڭ دا كەلىسىمدى قولداۋى ماڭىزدى ەكەنىن اتاپ ءوتتى.

— ءبىز ا ق ش تاراپىنان قوسىمشا اقپارات كۇتەمىز، - دەپ جازدى زەلەنسكي X الەۋمەتتىك جەلىسىندە.

رەسەي تاراپى ازىرشە ترامپتىڭ مالىمدەمەسىنە قاتىستى پىكىر بىلدىرگەن جوق.