رەسەي بايقوڭىردى قازاقستانعا مەرزىمىنەن بۇرىن قايتارۋى مۇمكىن
استانا. قازاقپارات - رەسەي بيلىگى بايقوڭىر عارىش ايلاعىن پايدالانۋدى مەرزىمىنەن بۇرىن توقتاتۋدى تالقىلاپ جاتىر، دەپ حابارلايدى Ulysmedia.kz.
Telegram-داعى INSIDER- T ارناسى «اقپاراتتان حاباردار دەرەككوزدەرگە» سىلتەمە جاساي وتىرىپ، رەسەي تاراپى قازاقستانمەن جاسالعان بايقوڭىردى پايدالانۋ تۋرالى كەلىسىمدى مەرزىمىنەن بۇرىن بۇزۋ مۇمكىندىگىن قاراستىرىپ جاتقانىن جازادى.
باسىلىم دەرەگىنشە، عارىش ايلاعىن قازاقستانعا قايتارۋ تۋرالى شەشىم 2026 مەن 2028 -جىلدار ارالىعىندا قابىلدانۋى ىقتيمال. بۇل باستاما جوعارى دەڭگەيدە ماقۇلدانىپ، سىرتقى ىستەر مينيسترلىگى مەن «روس كوسموس» سىندى نەگىزگى مەملەكەتتىك ورگاندارعا جەتكىزىلگەن كورىنەدى.
- قازىر بايقوڭىر اۋماعى 2050 -جىلعا دەيىن رەسەي مەن قازاقستاننىڭ بىرلەسكەن باسقارۋىندا. الايدا كرەمل قازىرگى تاڭدا وزگە عارىش ايلاقتارىنىڭ قۋاتى جەتكىلىكتى دەپ ەسەپتەيدى. سوندىقتان قازاقستانمەن بىرلەسكەن جوبادان جانە بايقوڭىر عارىش ايلاعىن، سونداي-اق اتتاس قالانى قارجىلاندىرۋدان تولىق باس تارتۋعا بولادى دەپ سانايدى، - دەلىنگەن جاريالانىمدا.
ايتا كەتەيىك، ازىرگە ەكى ەلدىڭ رەسمي مەكەمەلەرى بۇل اقپاراتتى راستامادى جانە پىكىر بىلدىرگەن جوق.
ەسكە سالايىق، بۇعان دەيىن رەسەي بايقوڭىردى جالعا العانى ءۇشىن قازاقستانعا 2025 -جىلى قانشا تولەيتىنىن جازعان ەدىك.
- 2025 -جىلعا ارنالعان رەسپۋبليكالىق بيۋدجەتتە رەسەيدەن «بايقوڭىر» كەشەنىن پايدالانعانى ءۇشىن 54 ميلليارد تەڭگە سوماسىندا جانە اسكەري پوليگونداردى پايدالانعانى ءۇشىن 9,4 ميلليارد تەڭگە سوماسىندا جالداۋ تولەماقىلارى تۇسەتىنى كوزدەلسىن، - دەلىنگەن قۇجاتتا.
بۇل تەك بيۋدجەتتىڭ جوباسى. جىل سوڭىنا دەيىن وعان وزگەرىستەر ەنگىزىلۋى مۇمكىن. تۇپكى قاراجاتتى جەلتوقساندا بيۋدجەت قابىلدانعان كەزدە كورۋگە بولادى.
