رەسەي «بايقوڭىر» كەشەنىندەگى 234 نىساندى قازاقستانعا قايتارماق
استانا. KAZINFORM - رەسەي «بايقوڭىر» كەشەنىندەگى 234 نىساندى قازاقستانعا قايتارماق. بۇل جايىندا سەنات دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان.
«2022 -جىلعى 2-جەلتوقسانداعى «بايقوڭىر» كەشەنى بويىنشا ۇكىمەتارالىق كوميسسيانىڭ 8- وتىرىسىنىڭ حاتتاماسىن ورىنداۋ اياسىندا رەسەي تاراپى جالعا الۋشىلار قۇرامىنان شىعارۋعا ۇسىنىلاتىن 234 وبەكتىنىڭ تىزبەسىن ۇسىندى. ولاردىڭ بازاسىندا 300-گە جۋىق جاڭا جۇمىس ورنىن قۇرا وتىرىپ، وندىرىستەردى ۇيىمداستىرۋ جوسپارلانىپ وتىر»، - دەپ اتاپ وتەدى ۇكىمەت باسشىسى جاۋابىندا.
ونىڭ اتاپ وتۋىنشە، عارىش سالاسى ينۆەستيتسيالاردى مەملەكەتتىك قولداۋ اياسىندا باسىم سالاعا جاتقىزىلعان. ۇكىمەتتىڭ 2016 -جىلعى 14-قاڭتارداعى № 13 قاۋلىسىمەن بەكىتىلگەن ينۆەستيتسيالىق جوبالاردى ىسكە اسىرۋ ءۇشىن باسىم قىزمەت تۇرلەرىنىڭ تىزبەسىنە عارىش اپپاراتتارىن، جۇيەلەرىن ءوندىرۋ، جوندەۋ، تەحنيكالىق قىزمەت كورسەتۋ سياقتى قىزمەت تۇرلەرى جاتقىزىلعان.
«تۋريزمدى دامىتۋ ماقساتىندا 2023 -جىلعى قىركۇيەكتە «بايقوڭىر» كەشەنى بويىنشا ۇكىمەتارالىق كوميسسيانىڭ 9- وتىرىسىندا بەرىلگەن تاپسىرمالاردى ىسكە اسىرۋ ءۇشىن تاراپتار ونىڭ بازاسىندا عارىش تەحنيكاسىنىڭ ۇلگىلەرى مەن ماكەتتەرىن ورنالاستىرا وتىرىپ، مۋزەي كەشەنىن قۇرۋ ءۇشىن «گاگارينسكي ستارت» 1- ءشى جانە 2- الاڭىن ودان ءارى پايدالانۋ جونىندە ۇسىنىستار ازىرلەيدى. «زەنيت- م» عارىشتىق زىمىران كەشەنى نىساندارىنىڭ تۋريستىك تارتىمدىلىعىن جاقسارتۋ ءۇشىن تۋر باعدارلاماسى ازىرلەندى. زىمىران قوزعالتقىشتارى، «سويۋز-5» زىمىرانىنىڭ ماكەتى ورناتىلدى، كيىز ءۇي ورناتىلىپ «ەتنواۋىل» ەكسپوزيتسياسى جانە تاعى باسقالارى جاسالدى. بۇدان باسقا، «بايقوڭىر» كەشەنىنىڭ «كرايني» اۋەايلاعىنىڭ اۋە كەڭىستىگىن پايدالانۋ جانە كەشەندە تۇراقتى اۋە قاتىناسىن قالىپتاستىرۋ ماقساتىندا قازاقستان مەن رەسەي ۇكىمەتتەرى اراسىندا مەملەكەتتىك ورگاندار مەن اككرەديتتەلگەن ۇيىمداردىڭ كەلىسىمىندە تۇرعان كەلىسىمنىڭ جوباسى ازىرلەندى»، - دەدى پرەمەر- مينيستر.
اۆتور
مارلان جيەمباي
